雅虎香港財經 【移民英國】倫敦車費好貴 搭地鐵巴士可以點慳錢？
移居英國選擇倫敦作為落腳點，其中一項挑戰係交通費貴，想慳錢就要了解繁忙時段同搭車優惠選擇。
美股、外匯、加密貨幣免費即時報價，自選投資組合獲取相關新聞提示。
齋搭巴士未必行得通
倫敦搭車最基本係買張Oyster Card，購買Oyster Card要支付£5，當使用滿一年後£5就會在車費中自動回贈畀你。
至於搭車選擇，最熱門係地鐵同巴士，以車費計巴士明顯較實惠。倫敦巴士單程車費不論遠近劃一£1.5，以Oyster Card、信用卡或Debit Card拍卡付款一小時內可免費轉乘巴士，仲可以轉搭經Wimbledon、Beckenham或New Addington的倫敦輕鐵（London Tramlink）。另外當日只搭過巴士加輕鐵，車費上限只係£4.5，即係搭足三程之後拍卡搭巴士輕鐵都唔扣錢。
搭巴士另一優勢係相對Tube地底路段，手機訊號接收清晰得多，毋須擔心搭到半路「斷網」。不過搭巴士都有一些弱點，首先係倫敦市中心區域經常塞車，令通勤時間忽然延長。同一條線巴士終點站未必相同，目的地較遠半路要轉車係等閒事。另外有時巴士到半路會換司機，這樣搞一搞又停車一、兩個字，假如你趕時間都幾頭痕。
地鐵車費繁忙時段加辣
想快捷的話首選都係搭地鐵，Transport for London（TfL）將倫敦劃分為9個區，市中心區域為Zone1，再層層擴至到Zone 9。TfL以Zone概念為基礎再引入繁忙時段收費加辣機制，繁忙時段（Peak）為星期一至五早上六點半至九點及下午四點至五點，即涵蓋熱門返工時間；非繁忙時段（Off Peak）除了係星期一至五其他時間，並包括星期六、日及公眾假期。
既然係加辣，繁忙時段用Oyster Card搭地鐵自然貴一截，例如由Zone 1到Zone 2，繁忙時段要£3，但非繁忙時段只減至£2.5，Zone 1到Zone 6就更明顯，繁忙時段要£5.3，非繁忙時段只係£3.3。不過用Oyster Card搭地鐵，亦可享每日（Daily Cap）及每星期（Weekly Cap）車費上限，例如由Zone 1到Zone 2，每日搭足£7.4，同日再搭就唔收錢；每星期搭足£37，該星期餘下日子再搭就同樣唔收錢。
想慳多啲車費，就要考慮買Travelcards或Citymapper Super Pass。Travelcards設有週票或月票，價錢按跨Zone幅度而定，例如由Zone 1到Zone 2，月票價錢£142.1，以30日除開每日都係£4.74，明顯較Daily Cap優惠平一截。
至於Citymapper Super Pass就屬於週票，初次購買必須買足四星期，大約夠你用一個月，暫時涵蓋Zone 1到Zone 6，例如Zone 1到Zone 2週票價錢為£33，較7日Travelcards收費£37平少少。Citymapper Super Passr另一好處係既有實體卡亦有專用App，而且可以按需要隨時選擇停用。
考慮買唔買週票或月票，關鍵點在於你多唔多在繁忙時段搭車返工，兼且跨Zone幅度有幾大。假如避唔到Peak又要跨Zone通勤，就要計計數用Citymapper Pass或TravelCard邊樣抵啲，同時考慮埋星期六、日出街的比率，度出適合自己又慳得最多的搭車方案。
伸延閱讀：
