香港股市 已收市

【King Sir傾樓】海外樓唔好為買而買!

如果買層海外樓諗住用嚟移民,或是未來退休自住的話,筆者舉腳贊成;圖為東京商住區。

香港人一向鍾情投資轉頭,無論香港住宅工商舖,定係大灣區海外樓都有捧場客。而近年愈來愈多人無論有樓好無樓好都想買返層海外樓,貪其一百幾十萬已經有交易。有很多讀者、學生問我,海外樓其實買唔買得過?我說要看你買嚟做乜——是自吖還是投資呢?

自住贊成 投資要諗諗

如果你買層海外樓諗住用嚟移民,或是未來退休自住的話,筆者舉腳贊成,因為起香港一百萬真係連車位都買唔到。但如果你買海外樓嘅目的係諗住「投資」的話,那就要先停一停、Check一Check睇吓你在香港係咪已經有層自住物業,如果未有就衝去買的話,筆者絕不贊成!

筆者接觸過很多海外樓買家,佢哋大多手頭揸住一百幾十萬,覺得香港樓好貴,呢世都買唔起,因此就想買返層海外樓填補一吓「心靈嘅空虛」,同人講起碼都叫做有舊磚頭揸手,其實佢哋嘅諗法,喺投資角度上係大錯特錯。

海外樓同香港樓一樣,都可以選擇承做按揭,但我發覺好多人買海外樓都唔做按揭,因為覺得煩,借幾十萬搞餐懵,而且當地按揭利息比香港貴一截,如馬來西亞約4至5%、泰國約6至8%、柬埔寨約10%,而大灣區都要5至6%,所以好多人都會選擇full pay,一來以後唔使供,二來又唔驚負資產,咁樣諗法更加錯上加錯。

投資物業最正係有槓桿

投資物業最可貴之處在於「槓桿」!如果你揸住100萬,你可能會full pay買層海外樓費事煩又唔使捱貴息,但同樣的100萬你可以選擇在香港以高成數按揭購買一層500至700萬嘅住宅(當然你要有足夠的供款能力啦)。

一層價值100萬嘅海外樓,同一層500萬嘅本地樓,如果幾年後大家都升咗兩成,海外樓嘅樓價係120萬,香港樓就已經升到600萬。以100萬的投資本金計算,買海外樓的回報是20%,但買本地樓的回報係一倍,足足係買海外樓回報嘅5倍,這就是槓桿的威力!

因此如果你有一百幾十萬資金而份工又ok的話,筆者建議你應先在港置業,一來唔使浪費「人頭」,二來亦可享受政府為首次置業者提供高成數按揭貸款的政策。當然如果你喺香港已經有層樓,投資海外樓亦不失為一個資金出路的好方法。總之,投資涉及風險,買海外樓始終是隔山買牛,最好能在當地實地考察了解清楚,咁買起上嚟就安心又放心啦!

葉景強(King Sir)

本欄隔周二刊出