【樓市贏家】買上源=做萬科白老鼠?(徐峰)
呢幾年好多中資發展商喺香港賣樓,仲要唔係細盤,除咗交通、設計、會所、價錢、間隔、校網之外,有無諗過物業質素會係點呢?好多時佢哋喺香港嘅項目唔多,點樣先知道佢哋建築質素呢?
好多時買樓花,交樓質素估估吓,但都可以用嗰個發展商過往賣過同級數嘅樓盤做參考,而如果要買一個從來無喺香港賣過樓嘅發展商嘅樓盤,就可以留意吓樓書。好似近期推售嘅上源,發展商萬科喺香港未曾有過獨資項目,對上嘅柏傲灣都係同新世界合作,所以可以話係完全無往績參考。
不過咁,一批新馬比賽,喺無往績參考情況下,血統可以係你落注時嘅參考資料之一,所講嘅血統,就係負責起樓嘅承建商。就好似今次賣嘅上源,雖然發展商唔會出嚟講係邊個起樓,但只要一打開樓書,其中「賣方及有參與發展項目的其他人的資料」一部份,就會見到「發展項目的承建商」一欄寫住「中國海外房屋工程有限公司」,咁你就可以參考一吓呢個承建商過往起過嘅樓盤喇。
但係呢,筆者都係對事唔對人,所以唔剩只講中資或者新發展商,買大型港資嘅樓盤同樣要睇承建商,特別係一啲有多個發展商合作嘅項目。
舉個例子,早幾年信和賣白石角天賦海灣,俾人話過好多次質素差,又漏水,地下花園仲好神奇咁沉咗少少,搞到個盤有段時間蝕讓不斷,而同樣由信和發展、同樣位處白石角嘅逸瓏灣,質素就好咗好多。實際原因就唔敢肯定,但天賦海灣係合作盤,雖然信和出面賣,但就由南豐負責起樓嘅,而逸瓏灣就係信和獨資嘅,一手包辦起樓同賣樓,咁係咪反映到承建商對樓盤質素嘅影響力?
承建商當然係一個重要參考,但除咗買現樓之外,名牌承建商都唔一定係無死,就等如新鴻基都有失手嘅時候啦。
=============================================