5個戒唔到Facebook的理由
Facebook洩漏用戶資料醜聞愈演愈大,創辦人朱克伯格(Mark Zuckerberg)下周便要出證美國國會聽證會解釋事件,澳洲亦將向該公司進行調查,調查其有否違返當地私隱條例,有網民覺得食得鹹魚抵得渴,預咗個人資料會被賣,但亦有人好嬲朱仔一邊話要打擊Fake News,一邊又「賣用戶豬仔」,嚴重到影響美國大選結果,開始思考要同Facebook「分手」。
Tesla創辦人Elon Musk早前身體力行鏟走Facebook戶口(但保留Instagram),但當我哋嘅生活已經同Facebook密不可分,分手真係話咁易?你先要衡量以下幾點:
不少人都是透過Facebook追蹤親友/死敵的近況,無咗Facebook呢個渠道,你禁得住八卦的心態嗎?
問吓自己:你有冇「分享症」?男朋友老公送禮物,仔女考到第一志願,靚靚自拍,買好嘢食好西,統統無得Share俾親友睇的話,你會唔會身痕呢?
朱仔創立Facebook的「初心」係要連繫世界上每個人,的確,Facebook上好多Group、Page都成為志同道合的人連繫的地方,例如食齋的朋友分享KFC磨菇飯原來唔係齋,如果一旦離開Facebook建立的社區,接收相關資訊可能落後於人,所謂FOMO(Fear of missing out),你戒唔戒到「資訊癮」先?
好多App或網上平台例如Airbnb、Tinder登記用戶資料時,都會俾「用Facebook登入」呢個選擇大家,唔少人怕填資料麻煩,都會選擇用Facebook登入,如果無咗Facebook戶口,代表某些App嘅戶口要重新登記。最煩係例如Spotify呢啲收費App,你先要取消Subscription然後重新開戶,裏面嘅Playlist一嘢無晒,會唔會好似李香琴無得睇「深海獵奇」一樣世界沒日?
Facebook擁有的點止一個App,Instagram、WhatsApp都喺佢魔掌裏,如果怕私隱被賣,理應連帶所有App都鏟走,你做到嗎?
講到尾,社交媒體已經成為所有人的生活軸心,要戒一啲都唔易,而Facebook呢隻怪獸已經入侵我哋生活每個層面,相愛很易,分手很難,大家未準備好戒上網的話,惟有去調較戶口的Privacy Setting,盡量減少被Facebook截取資訊,方法可以在這裏找到。
部分來源:CNN
19+精選推介
秒like 19+ Facebook!