5G手機點先令人心動
唔少投資者仍然憧憬蘋果靠5G iPhone發大財,但AT&T CEO就直言唔好對5G手機期望太高,面對這盤冷水,係時候思考一下5G手機點至會令人心動。
AT&T CEO雖然對5G熱潮撥冷水,但其分析都幾務實,他表示5G手機未至於無人問津,相信有唔少人會升級到5G iPhone,但亦有唔少消費者考慮荷包而留守4G網絡。簡單來講,面對經濟前景不明朗,5G iPhone面世都只係吸引「正常」人數用戶升級,未必會即時掀起大規模換機潮。
手機廠商最怕你唔換機,想提升5G換機誘因,最簡單策略係平。蘋果日前發布全新iPad Air,注入iPad Pro大量功能及設計特色,再加上依期好實用的指紋辨識鍵及具競爭力價錢,即時令唔少人心動。假如蘋果用同一策略,以賣大包價錢推出5G版iPhone SE Plus,無全屏有大芒有5G再加指紋辨識鍵,或許較新版5G iPhone Pro更容易吸引果粉升級到5G。再進取啲可以套餐式銷售,瞄準近年多咗人買laptop,廠商就可以將旗下Laptop及5G手機系列打包銷售,加埋一齊買等於打七、八折,都有機會令用家作出索性換埋手機的消費決定。
另一策略係「電」,近日電視台熱播的新版Samsung Note廣告,其中力sell電力夠用一日,但一日似乎都太基本,假如將機身做厚一點並引入電池新技術,令5G手機添上瘋狂煲劇打機電力夠用一日,正常使用電力夠用三日,或許會觸發懶叉電用家的換機衝動。
最後策略係「送」,據悉新一代手機為減成本,將陸續刪除叉座、有線耳機「唔等使」配件。假如順勢追加高級配件,即使賣貴一點都可以令用家心動。例如以打機為賣點中價5G手機,送可以套入手機的遊戲控制器或VR眼罩,又或手機送降噪耳機,都可以突出5G優勢又令手機變得更抵玩。除了硬件亦可以送軟嘢,以往上台零蚊出機,現在亦可以掉轉玩,買5G手機送你兩年5G Plan,幫電訊商綁足用家兩年,兩年後自然無理由倒退用返4G Plan吧。
但如果上述策略欠奉,覺得消費者聽到5G,荷包就會高潮,那就是大錯特錯了。
===============
精選資訊網站「中環街市」 臉書粉絲頁