6月過四關 板塊要點揀?(魏力)
6月份四件大事:美聯儲月中議息、A股入MSCI決定、英國脫歐公投、深港通。前三單已經有哂日子,最大不明朗因素係深港通。最新傳聞係:深港通會在MSCI決定前公佈,即應該係6月上旬。再對番6月大事schedule,6月15日議息才塵埃落定,故6月至少頭一個星期,港股都應該處於安全期,即係起碼仲有幾日炒。
另一邊廂,資金湧入南方A50基金(2822),上周三(25日)錄得5,000萬股淨申購,約6億元人民幣資金淨流入,大額到南方東英都出份新聞稿講番,但之後A股繼續死下死下,事件就淡化咗。及至本周一(30日)滬深兩市成交跌至3400億人民幣,較4月反彈高位少三分二,股民死心不入市,昨日A股就開車。物極必反,作為一個資金博奕場,股市也是如此。
作為月頭展望,不如講吓四件事對各板塊的影響:
美聯儲議息:現時市場多預期最快7月先加,但6月會議後會見傳媒,到時耶倫應會再披露較明確的加息路向,這應有利本港地產股作短期反彈,6月份,就算唔long地產股,都唔好put。
A股入MSCI:未來幾日A股應仲有得炒,穩陣揀南方A50(2822),進取一點揀中港券商,自己鍾意國泰君安(1788)、海通國際(665)。至於蚊型本地券商,夠貼市也可炒上落。
英國脫歐:自己睇機會不大,應有利歐洲股市表現,但受惠港股不多,相關股圖表亦唔掂,暫時無推介。
深港通:好多券商已經出哂report畀貼士,最大路當然係港交所(388)、惠理基金(806);行業去睇,本港上市科技股平A股同業一大截,應會受惠,亦都正在熱炒,科通(400)、舜宇(2382)、信利(732)三箭頭,網龍(777)、通達(698)追落後。其他心水係:和諧汽車(3836)、先健科技(1302)、智美體育(1661)。