Bill Gates係咪唔識電動車
Bill Gates早前發表文章直指Tesla電動貨車Semi永遠不會出現,有網友聽到走去問Tesla教主Elon Musk,Elon Musk乾脆回應「條友唔識」,咁Bill Gates係咪真係唔識電動車。
Elon Musk貴為地上最強電動車企業掌舵人,大家都唔敢質疑他係電動車技術權威,反觀Bill Gates搞I.T.出身,牌面睇似乎相對Elon Musk,Bill Gates可能真係唔多識電動車。
不過Elon Musk本身都唔係做車而係搞I.T.出身,所以計起跑線他與Bill Gates屬於同一範疇。況且天才型科企領導人,其中一項特質係學習能力超強,性格較為「宅」的Bill Gates就係當中的代表人物。
Bill Gates強項係當對某樣嘢有興趣,他就會瘋狂刨書刨文再找相關行業人士索料,加上自己獨門分析技巧,令自己極速掌握呢樣嘢的知識兼歸納出個人見解。Bill Gates這項本事在「宅」界其實係平常事,不論係動漫宅、巴士宅或鐵路宅,當他們「入坑」後,都會瘋狂刨資料及向同路人索料,務求盡快成為這範疇的專家,甚至可以向「後輩」指指點點享受權威樂趣。
Bill Gates既有極速鑽研新事物習慣,他亦有誘因關注電動車的發展。他全力推動的慈善事業,其中一項重要範疇係環保,他自然會留意電動車的發展。當然他不像Elon Musk般身處行內,未必知悉一些電池技術的新突破。
不過事實係Tesla貨車面世日期一推再推,而以氫燃料電池作賣點的Nikola貨車真身亦未見影。甚至講明大搞氫燃料電池貨車的上汽集團,預計新車落地日期死線都定在2025年。所以假如Bill Gates預測係「未來數年」而不是「永遠」,命中率就會高得多。
但這又伸引到Bill Gates另一看家本領係唔怕估錯,Bill Gates係I.T.界知名「修正主義者」之一,他每逢估錯趨勢,不單唔會頑固堅持,更會極速扭軚變陣。由昔日的網頁瀏覽器,到後來微軟押錯注在智能手機再變陣到雲服務加Surface系列收復失地,都印證Bill Gates唔怕錯最緊要改的強項。甚至近日他都修正自己對新冠疫苗睇法,話應該將希望放在私人藥企之上。
所以講唔定明年他又會修正自己對電動貨車看法,甚至私人投資創新電池業務兼成為Tesla供應商之一,到時Elon Musk又可能修正話Bill Gates以前唔識但條友依家識得電動車了。
===============
精選資訊網站「中環街市」 臉書粉絲頁