雅虎香港財經 Bossip｜金融闊佬謝皮實錄｜Louise
步入新時代的香港，商界大佬、富二代、富三代都似乎刻意低調起來，有時低調還是謝皮都是一線之差。
望到吉舖 慘過撞鬼
有位收租佬朋友，話行過中環、銅鑼灣的吉舖會「心寒」，以為佢陰陽眼見鬼，原來慘過見鬼！佢喺銅鑼灣有個自由行旺舖，以前租給鐘錶店，月租60萬元，真夠佢日日開支靚紅酒。租客捱到2019年底頂唔順退租，跟住疫情初爆發，地產經紀找到一家賣運動用品的小店，月租壓到6萬都立即應承，佢話做生意要面對現實，有租客好過納空租。近日行過其舖位，見隔離統統都是吉舖，所以60萬變6萬都算執身彩。
通關無期 名醫也拖租
以往在中環執業的醫生特別架勢，有中環業主學中建大厦咁，將成幢大廈改建成醫療商厦，以為租金有保證，不少醫生都以希瑪眼科（3309）主席林順潮醫生為目標，大搞醫療集團，等住內地人南下來睇醫生，再發大來上市搵快錢，疫情殺到，真係得閒死唔得閒病，有個愛國商人的後人為名醫，兩年多前其醫療集團就喺中環插旗，通唔到關冇大陸客之下竟要拖租，大業主啞子吃黃蓮，謂：「你夠膽出信去追咩？」
恒大債主睇公海賭王頭
恒大（3333）爆煲後，除了一眾鋤Dee會富豪級人馬以百億計咁輸錢，好些跟富豪搵食嘅馬仔都輸到攤攤腰，好似第一代飲食界KOL、去酒店飲茶要兩個茶包的那位，佢位喺金融界打滾的胞兄，據知喺恒大都傷得幾深下。
綽號「飛仔莊」的莊紹綏，佢公司莊士機構（367）及莊士中國（298）投資内房債元氣大傷，恒大、富力（2777）、花樣年（1777）皆有沾手。飛仔莊都沒以前風騷，中環陸羽及家全七福都鮮見其踪影。以往同富力老細兩公婆出海暢游，又有美女相伴不知幾風騷。最「沙pop」的是恒大債主之一的公海賭王連超個仔，入稟申請恒大清盤，排定頭位等拆骨分錢。其他債主都睇佢頭。
澳博日燒1,500萬
洗米華被拉後，賭廳已玩完。近日澳門封城，最水深火熱的澳博（880）即使未禁足强檢，每日要燒1,500萬元，主事人均十分緊張，謂昔日澳娛此金鷄秒秒鐘生金蛋，五十年以來未有試過要泵水。幸好今年3月澳博同銀行做了一輪融資，否則就好似珍寶海鮮坊咁喇。
至於早前搞到隻珍寶海鮮坊滿城風雨嘅同族人何猷龍，仲有隻「太白海鮮舫」要處置，聽講有飲食界人士上船睇過，想改裝為水上酒店做staycation生意，但都計唔掂數，唔敢落叠。
細價酒有市場
股市缺水，恒指今年表現全球排尾二，仲衰過俄羅斯及烏克蘭， 細價股更無運行。連Eugene莊友堅都宣佈金盤洗手，不再炒股票，又係嘅，證監會主席歐禮達要起身，未來股市遊戲規則總會有變，睇通攤路嘅Eugene莊索性收檔唔玩。早幾年在細價股玩到出神入化的粉哥葉志輝（Steven），佢老哥雖然滴酒不沾，以往都好豪氣訂靚酒待客，但生意淡薄，最近訂的酒是$40支紐西蘭table wine，跟紀曉波搵食的Dino哥則喝$50支，貫徹「細價」宗旨。搵食艱難有得你飲咪算偷笑咯！
Louise
註：專欄作家言論不代表本網立場
密切留意BossMind動向！立即CLS
Powered by Mercury
