雅虎香港財經 Bossip｜富豪慳家有法 黃志祥一個司機「兩用」｜Louise
生不逢時嘅海洋公園Fullerton酒店終於開張。正所謂新屎坑，梗要去Staycation睇吓乜料。
上周六，撞正酒店老細之一嘅信和集團黃志祥兩父子喺Fullerton巡視業務，聽到黃志祥正鬧緊個酒店總經理，即刻豎起耳仔聽吓，黃志祥有點勞氣地話：「如果啲錢係你自己嘅，會唔會咁樣嘥啲嘢？」
成日聽到幫富豪打工或招呼富豪嘅私人銀行家呻，啲有錢佬點孤寒，其實富豪之所以係富豪，就係有佢條數計，即使對仔女都會勒住勒住㗎。
一個司機兩個崗位
好似黃永光鍾意玩吓法拉利，只不過係二手車，咪睇信和旗下嘅黃金海岸泊滿富豪遊艇，黃永光都只係最近先做艇主，慳慳地買艘50呎遊艇。
最精明係，怕司機車完老細上船後冇嘢做，索性叫埋個司機學揸船，咁又慳番唔使養住個船長，個司機又肯上進，去考埋個船牌，咁份工就更穩陣啦。
信和集團總部位於尖東，黃志祥放工後都係徒步坐港鐵過海，再叫司機喺金鐘接佢，避開條富貴隧道，一來一回慳150蚊隧道費，又唔使塞車，富豪嘅時間先至係錢嘛！
幾年前在星航的lounge撞過佢老哥坐飛機返老家星加坡，喺lounge食完一餐後，服務員又好識做打包份三文治俾佢攞上機，可能夜晚到達新加坡後，晚餐都唔使啦。
孤寒都可以出名
以往好多富豪都慳到出汁，已故嘅小甜甜更加係慳家女皇。以往記者會完後，小甜甜叮囑員工將剩低嘅西餅打包攞走唔好浪費，咁都好過中巴顔氏家族曾以隔夜西餅款待小股東嘅。
新地創辦人郭得勝都係慳家王，做成單刁喺福臨門慶功請員工食餐飯，自己都係叫碟窩蛋牛肉飯，咁在座員工唔通叫魚翅鮑魚咩？
佢胞弟郭得標喺福臨門咬咗半隻鮑魚後，投訴冇「溏心」，經理準備換過隻俾佢，佢即截住話「唔好嘥，等我食埋佢啦」，但條數又點計呢？唔通收佢兩隻鮑魚錢咩？
已故工廈大王楊耀松對「孤寒」則有另一番解讀，佢請食飯通常「冇骨落地」，農曆年又會去Las Vegas避年唔使派利是畀員工，坐飛機亦只係經濟艙，認為「孤寒都係出名的一種方式啊。」
現時喺柴灣、觀塘、長沙灣以佢命名嘅工業大廈，原來亦有數計，因為唔使俾錢賣廣告都有人識自己喇。
喺柴灣嘅「楊耀松工業大廈」有個小巴站頭，乘客落車都會嗌：「楊耀松有落！」釘咗近廿年嘅佢，真正名留千古，吹脹！
其實富豪孤寒，因為佢哋搵嘅錢有血有汗，通常「假富豪」、乜乜博士呀，先會周身名牌，米芝蓮食府及名人合照四圍share，所以孤寒財主先係「真富豪」呀！
Louise
註：專欄作家言論不代表本網立場
密切留意BossMind動向！立即CLS
Powered by Mercury
