雅虎香港財經 CFO財報解密│四大內銀逆市下跌嘅原因（Benny）
上星期中央政府推出力度好猛嘅救市措施，包括降準0.5%向市場提供額外1萬億流動性；七天逆回購利率由1.7%下降至1.5%。同時特別針對房地產市場，引導商業銀行將存量房貸利率降至新發放貸款利率附近，另外第二套房貸首付比例改為與第一套睇齊，即係由25%大幅下調至15%。
美股外幣即時報價 多國新聞任睇
港股四大內銀股價逆市下跌
至於針對股市，央行會接受券商、保險公司、基金以手上持有、流通性唔高嘅債券股票做抵押，換取國債用作投入股票市場嘅資金之用。同時又引導銀行，向上市公司主要股東提供貸款，以作為佢哋增持或者回購自家上市公司股票嘅資金來源。
以上救市措施推出後，中、港股市近一星期升勢異常強勁，港股更創下單日成交金額紀錄。但與此同時，有冇留意到近兩個交易日（9月27日、30日），港股四大內銀股價竟然意外地以高成交量逆市下跌：建行（0939.HK）累計兩日跌5%、中行（3988.HK）累計兩日跌4%、工行（1398.HK）累計兩日跌4%、農行（1288）累計兩日跌8.5%。呢種情況所釋放出嚟嘅訊號，就係市場覺得救市政策喺刺激國內股市、樓市嘅同時，可能令銀行嘅風險增加。
政策風險由銀行承擔
因為降準、降息、降低第二套房首付比例，以至向上市公司大股東貸款，畀佢哋增持股票，全部都可以為近年疲弱嘅股市、樓市注入流動性嘅同時，亦都提高咗商業銀行喺呢兩個市場嘅貸款規模。但係喺大環境、基本面冇特別改善情況之下，銀行喺呢兩個市場所增加嘅貸款規模，反映緊嘅就係佢哋面對嘅信貸風險都同時有所增加。換句話說，救市措施有機會將呢兩個市場現有嘅下行風險部份轉移咗喺銀行身上。呢個就係當市場逐漸消化推出救市政策嘅細節後，對四大內銀嘅轉向反應嘅原因。
當然今次中央政府推出嘅救市措施力度之大係近年罕見，充分顯示咗佢哋想今年內要達到目標GDP嘅決心，同時亦都可能反映國內目前經濟狀況的確令人憂慮。所以如果要股市長遠都可以維持現有嘅暢旺程度，除咗現有增加股市流動性嘅措施外，更重要嘅係後續會更多長期從支持經濟基本面著力嘅政策推出，從根本上改善同提振經濟。
Benny Yam
執業會計師
本欄隔周三刊出
