CFO財報解密│從Tesla基本面與股價反差學習獨立思考(Benny)
投資股票獨立思考最緊要,好似最近Tesla(TSLA)就係一個好好嘅例子。市場話佢啲車唔受歡迎,所以要減價;又話佢個市場份額將來好快會被同行蠶食,市場好恐慌,股價年初時直插到108蚊。
美股外幣即時報價 多國新聞任睇
唔通股價真係反映Tesla競爭優勢無咗?當然唔係,當時我喺FB講咗好多次,佢產、銷量歷史新高,減價未必可怕。
減價未必可怕
無錯,減價直觀感覺係影響銷售收入,但銷售收入係單價剩以銷量,佢係賣唔出先減,定係一種競爭策略?價減咗但量有冇升?
有睇開佢財報,就會知Tesla毛利率好高,減價前30%以上,就算減價後都有26%。所以我當時成日講,咁多利潤空間怕咩減?
事實證明,佢減價一、兩成,訂單就爆升500%,話佢啲車唔受歡迎嘅說法不攻自破。
仲有,如果有留意埋Tesla 競爭對手基本面、純電動車經營情況,就會知佢地一係就仲蝕緊錢,一係就只有微薄利潤。
咁當Tesla開始減價,競爭對手有咩招架能力?係無。跟減價虧損可能會更大;唔跟減就注定會俾佢搶生意,呢個係基本事實擺在眼前,俾我哋去獨立思考。
被搶市佔堅定留?
話Tesla將來好快會俾同行蠶食市佔,又係漠視緊真實經營情況。純電動車計,Tesla 2022年產、銷140萬架,係歷史新高。中國比亞迪約90萬架、歐洲Volkswagen約 60萬架,而其他車廠都只係講緊(吹緊)邊年邊日後,就可以量產到十幾至幾十萬架。
即係話呢一刻實實在在發生緊嘅係Tesla產、銷量全世界最勁,拋離所有對手一大截,而且全部對手利潤率都低好多,可減價空間不大。所以唔好講競爭對手點樣搶佢市場先,個事實反而係Tesla用減價策略蠶食緊同行市佔。
當Tesla股價低迷就嚟穿100蚊嗰時,市場根本係恐慌性price-in緊一啲謬誤(減價影響)、一啲未發生同機率唔高嘅結果(被蠶食市佔)。
但如果嗰一刻,你係一直有研究佢基本面,就多多少少會抵擋到呢啲恐懼心理,好獨立地睇得到Tesla 嘅絕對競爭優勢、業務仲係增長緊既基本事實。
所以點解當佢1月尾出嘅業績,收入同利潤都創歷史新高,市場好似恍然大悟,加埋加息幅度緩和嘅加持,股價一個月時間就彈番70%,貼近200蚊。
獨立思考、力排眾議唔容易,但投資回報分嘢可能就係只差於你對事實真相獨立思考嘅執著。
Benny Yam
執業會計師
Facebook專頁「CFO講年報」作者
https://www.facebook.com/cfobenny/
Patreon
https://Patreon.com/Cfo_benny
本欄隔周三刊出