CFO財報解密│Apple Vision Pro透視蘋果與Meta之間嘅經營距離(Benny)
蘋果6月5日舉行2023 Worldwide Developers Conference,推出咗好多年都無嘅新產品:視象眼鏡Apple Vision Pro。第一印象你可能會覺得無新意,都係VR眼鏡、元宇宙。Meta早幾年就推咗賣USD499,蘋果而家賣到USD3499,好難賣得好喎。
美股外幣即時報價 多國新聞任睇
其實蘋果唔係sell緊VR眼鏡同metaverse。Metaverse係要帶你離開同隔絕自己嘅真實世界,因為你戴咗VR眼鏡,就唔會再睇到現實世界。Meta係做緊要你取捨、改變現有生活模式呢啲高難度嘢,阻力一定大,普及性一定低、或者唔會快,起碼而家咁耐都係咁。
但Apple Vision Pro係做融合虛擬同真實世界,玩嘅係AR(Augmented Reality),唔需要你只可取捨虛擬世界與真實世界之間。佢係令你個iOS介面唔再局限於傳統電話屏幕,而係extend到你生活視覺嘅任何一個角落:你個客廳、你間睡房、你個office、或者你間廁所,即係將佢已經好有用戶忠誠度嘅iOS生態系統變得更無處不在。
經營智慧上嘅分野
當初Meta想攪嘅係革命性、顛覆人類認知嘅元宇宙,但當喺燒咗好幾年錢都睇唔到明顯效果時,佢就應該明白呢樣嘢太顛覆,需要調整策略試吓新方向,唔需要一定堅持燒錢,去叫人玩好遙遠嘅元宇宙。
好似蘋果咁,望住Meta個VR眼鏡攪咁耐都唔係好得,即係市場唔太buy,所以佢唔勉強一定要帶你去Metaverse,反而係好靈活但又唔複雜地用AR技術去擴大用戶已經用緊嘅iOS dimension,由2D去到3D。
呢招後發先至,我估蘋果係觀察咗Meta嘅VR眼鏡好耐,覺得呢個階段AR係較佳嘅切入點:既唔需要用家離開現實,又畀到虛擬空間佢哋。Meta喺reality lab燒咗咁多錢,其實就係幫緊蘋果慳番一大筆試市場水溫成本。
但其實VR、AR都唔係新技術,VR太前衛,市場普及唔到嘅時候,點解朱克伯格就無諗過做AR呢?只係一線之差,但個效果就由隔絕現實世界變成融合現實世界。簡單嘅動作,從商業角度出發,可能就係衝破對虛擬世界普及阻力嘅轉捩點。
無論係buy now pay later,無論係high yield saving account,蘋果都係做緊簡單但已被市場驗證實用、生活化嘅服務,只不過將啲服務搬去佢iOS生態系統,穩穩陣陣。但Meta嘅元宇宙似係一廂情願,需求未預備就急推供應去冒險。呢個真係管理層眼光、視嘢、市場觸覺嘅距離。
所以你會明白點解蘋果股價前日又創歷史新高,而Meta雖然最近升番好多,但距離歷史高位仲差一大截;可能你都體會到點解股神畢菲特十幾年前已經口講話 Meta係一間好公司,但佢就只買蘋果股票。
因為蘋果同Meta嘅經營距離,就係一個做簡單有用嘅嘢,一個做緊複雜但冇用嘅嘢,而又從來唔識變通。
Benny Yam
執業會計師
Facebook:https://www.facebook.com/cfobenny/
Patreon: https://Patreon.com/Cfo_benny
本欄隔周三刊出