【大茶飯】被遺忘的MSCI(青冰)
MSCI將於星期二收市後增加A股的比重,相信大家都差不多忘了,沒辦法,因為整個5月都是貿易戰的消息,近日再加上全面封殺華為,市場上的焦點去晒呢度,之不過,冇人留意唔代表對市場沒影響的,更有可能在暗地裡放大咗效果添。
MSCI在3月公佈,將在5、8及11月分三階段上調A股在的比重,而這個「利好」的消息,在2月初時已經開始炒,大行紛紛發表報告,指將為A股引入幾多百億千億的資金,所以那些日子坊間都係叫人買A股ETF。按港交所的數據,在首4個月,經過互聯互通北上買A股的資金,共有1074億人仔,都幾驚人,就咁睇個數字,外資似乎真係一直買到5月底喎,但細節位係,其實頭兩個月已經買咗1208億,換言之,3至4月係走咗資添,截至上星期五,5月外資共走資482億,嘩乜走得咁快。
操作上,指數基金唔會去到最尾嗰日先做嘢嘅,況且今次係加大比重,即係本身都係那些股票,新加入的股並不多,而佢哋慣性都會同投行有合作,用唔同的衍生工具增加自己的exposure,最終目的只要收市那天買得齊貨,又唔太影響個市場已經OK啦。大家雖然見到外資在5月日日凈流出,但都唔代表MSCI相關買盤冇買嘅,只係5月股市實在太弱,人仔又貶值,A股今年又升得多,有龐大獲利盤亦可理解。
調整比重的另一影響,就是會影響幾隻中港重磅股,由於A股都是屬於MSCI中國指數,所以增A股比重,就會減H股、民企及海外上市的股份,現時MSCI中國最大比重的分別是騰訊(0700)、阿里巴巴、建行(0939)、平保(2318)及中移動(0941)。由於5月中港股市實在太弱,其實都分唔清啲指數基金沽盤有冇偷步沽貨,但可以肯定的是,在明天收市之後,佢哋就唔會再沽喇,屆時就不能賴換馬拖累股價表現。
而中國及香港指數,今次都有新貴的,維他奶(0345)、李寧(2331)、中教(0839)及奧園(3883)都會加入,而加入小型及微型指數的股份極多,有興趣的可以搵個清單,睇吓星期二收市時會唔會有異動。而最有趣的,就是將加入小型股指數的Mega Expo(1360),在月初被沽空機構話收購交易涉欺詐,隨後停牌,而MSCI就在月中宣佈將佢納入,當大家都以為佢未能趕及復牌,佢就在上星期五午後復牌,股價裂口低開45%後一直反彈,幕後人真係醒目,揀啱時間復牌,有指數基金出手幫拖,跌都冇跌得咁甘嘛。