雅虎香港財經 【大茶飯】半年結前最後考驗（青冰）
今篇係本欄在半年結前的最後一篇，趁這個機會先回顧後展望。剛踏入2019年時，應該十居其九的分析，都會認為今年相當難挨，恆指在第二個交易日跌穿25000點，不過當日亦係見底日，跟住連升三個月，高見30280點，高低位有5384點，現時問返你那三個月因乜而升，都唔係好記得喇，都係貿易戰氣氛舒緩，內地經濟數據冇預期咁差嗰啲啦。
轉捩點是5月初侵侵的一個tweet，將整個投資氣氛扭轉，貿易戰又變返重點，其他咩經濟數字，靚靚業績全部擺埋一邊，5月恆指由高位計，跌了三千點，果真五窮呀，以往大市急挫，二三線股份都仲有零星炒作，不過5月真的乜叉都跌，記憶中唯一炒過嘅係沒有稀土礦的稀土股。
當大家都一致睇淡六絕月，秋官套戲大結局後就見底，反彈幾日，接著本港逃犯條例搞到民怨爆燈，只有短暫打亂反彈步伐，最後侵習通個電話，為侵侵正式競選連任做勢，即使你覺得佢幾茅都好，個市又真係跟住爆升，藍籌股見動力，個別新股表現標青，市況唔叫得大旺，但同原先預期的六絕月，已經算好好喇。
今星期港股將迎接兩個重磅考驗，講咗好耐的G20將舉行，中美元首會進行見面，至於是否會達成協議，青冰仍傾向於悲觀，貿易戰在過去一年，都係反高潮為主，當你覺得冇事，又突然升級，當你覺得死梗喇，又突然話有得傾，今次G20前氣氛似融洽，反而應該驚驚啊。另一個考驗就是七一遊行，政治一日都嫌長，未來一星期雙方有咩新部署呢？究竟仲有冇豬隊友走出來火上加油，鼓動更多人上街呢？青冰唔識分析，但會歸納為持貨風險之一，所以未來幾天食糊避險，屬明智之舉。
下半年將有阿里巴巴回歸，及南非股東分拆騰訊(0700)持股的公司在荷蘭上市，對環球股市來說都是大事，巴巴抽水千幾億，有人怕香港吃不消，青冰卻只怕屆時升得少，回歸是國家任務，定價低升得多，既有財富效應亦可搞活中港股市，除笨有精，如意算盤係咪咁，等多三個月就知喇。
