雅虎香港財經 【大茶飯】為半新股再作回顧（青冰）
早幾日有戰友PM，話之前青冰寫過幾隻半新股，已經有兩隻開車了，問餘下的一隻，究竟有冇前景呀，青冰即時想起，係喎，原來真係寫過，但都唔算係好深入分析，三隻股分別是中匯(0382)、錦欣(1951)及中梁(2772)，今次略作回顧吧。
三股同樣是在六、七月上市，最先跑出的是中梁，上市頭三日已經炒上，不過就是只得那三天，內房在第三季係偏弱，中梁以平價上市招徠，照睇就應該最防守性吖，要死都應該係貴嗰啲內房死先，不過事實證明平嘢唔一定具防守性，你睇中移動(0941)就知啦，十倍市盈率5厘息，防守性仲弱過任何公用股，所以又上一課喇(包括青冰)，新股半新股，平唔一定係入場因素。
錦欣概念獨特，但上市兩個幾月來，都未認真炒過，真正的催化劑，就是9月9日加入港股通，仲要係生效前的星期五先破位。說也奇怪，恆指公司在8月公佈恆生綜合指數的更替，雖然青冰一向都話個list好難睇得清楚，但有心睇都應該知錦欣入得綜合指數，以其二百億市值，又冇穿冇爛，應該好難唔入嘅，但奇又奇在，由宣佈至生效的幾星期，真係郁都唔郁，搞到青冰都不敢輕舉妄動。生效後北水又真係好捧場，經常出現在買盤上，按CCASS數字，在這段日子，已經累積買入了約3600萬股，看來日後還是睇北水打骰。
至於中匯，原來青冰兩個月前係咁寫，「BNP保薦的教育股，舊愛中教(0839)都係上市後死吓死吓，之後跌穿招股價震死晒大家，之至慢慢做嘢，相信中匯的手法亦會相近」。真係估唔到，手法真係似到咁，8月跌穿招股價再上返來，今月初再插至2.65元先至見底，早前教育股炒上，中匯按兵不動，近期教育股表現一般，有啲仲回吐不少，但中匯就在最近兩星期做嘢，走勢強到離譜，當然佢都有盈喜配合的，也不是亂炒。所以新股都係認班底最重要，如果不是內線人，唯有在保薦人身上找往績找共通點，雖不是包生仔，但總比瞎子摸象好啦。
沉靜咗兩個月的新股市場，開始又有新力軍上場，不過普遍實力都比早前的差，所以暫時還是忍忍手吧。
