雅虎香港財經 【大茶飯】下年恆指有睇頭（青冰）
睇這個標題，戰友必定以為青冰在預測下年的恆指目標價，這個吃力不討好又未必幫助到自己賺錢的事，估必費氣力去做呢？本文只是討論下年恆指變革所帶來的影響，因為即使你唔炒指數股，強積金都會投資本地基金吧。
恆指公司在上周五的季檢，宣佈成份股維持不變，但卻預告下年有重大變革，明年首季將作市場諮詢，重點有二，同股不同權股份(W股)是否納入恆指，及檢討金融股在指數內的比重。
戰友有跟開青冰的文章，也知道經常批評恆指內金融股比重太高，按上周的數據，11隻金融股佔恆指49%比重，環顧全球主要指數，絕不會出現此事，戰友可參閱青冰專頁的幾個主要指數截圖，無論是標普、道指、日經及英國富時指數，比重最大的行業，也只會約兩成，難道英美日不是國際金融中心嗎？但恆指卻容許這現象維持超過十年，所以我們的恆指跟12年前係差不多，若非近年騰訊(0700)及友邦(1299)爭氣，相信情況會更糟。
既然恆指公司作檢討，即係話來年金融股佔半壁江山將不復見，斷估應該會將上限設在兩至三成，青冰認為對整個恆指的投資價值，將大大提高，但被動型基金如盈富(2800)，必然會大幅減持金融股，如果下年佢哋好景，影響就冇咁明顯，否則就要小心屆時的龐大沽壓。不過都提返你，N年前匯控(0005)獨大，恆指決定將個股比重上限設在10%，也會分一至兩年去調整的，相信今次亦會如此。
至於納入W股進恆指，似乎是大勢所趨，無可避免，現時兩隻W股，小米(1810)及美團(3690)，相信後者會最受惠，就以傳媒及大行的評價，明顯是傾向後者，挾五千億市值的美團，仲未有錢賺，但大行的目標價全線過百蚊，可見係力煲的對象，究竟係染藍先定爆煲先，就看來年的市況喇。
至於即將降臨的阿里巴巴，入港股通是必然之事，如果W股可入恆指，也是為巴巴打通條路，但最後的障礙係是否第二上市，由於恆指只納第一上市的股份，青冰搵過料，巴巴只要選擇雙重主要上市（Dual primary listing）便可解決，究竟巴巴是否在乎染藍，他們的上市團隊必會有提供意見，過多幾星期便知。
總括來說，今次變革踏出正確一步，如果下年加入百威(1876)、美團(3690)及阿里巴巴後，再適度調低金融股比重，青冰定必身體力行，將MPF轉做恆指基金。
--
