雅虎香港財經 【大茶飯】金融市場反轉再反轉（青冰）
上星期五的晚上，在短短幾小時，金融市場渡過了最刺激的過山車行情。先在星期四，侵侵發tweet話已經非常接近達成貿戰首階段協議，將美股三大指數推至歷史高位，之後華爾街日報話細節將會係中國買500億美元農產品，美國方面將會把關稅調低作回敬，咁星期五的亞洲股市自然興奮啦，恆指急升694點收市。
周五晚上內地突然宣佈將於晚上十時半舉行記者會，市場預期將有好消息公佈，美股期指再漲，正當大家諗住開心過周末時，晚上十時侵侵發tweet，話華爾街日報的報導是假的，尤其指關稅方面，金融市場隨即震盪，人仔離岸價由6.96抽升至7.02，恆指夜期由約27750點，急挫至27500點，十年債息由1.89%跌至1.85%，講緊嘅係幾分鐘的事。中方記者會由10點半延至11點，美股開市微跌，靜待記者會。
就在這個時候，青冰跟幾位戰友傾過，認同個協議應該是中性，不會是大好，原因是，如果是全面握手，應該有個聯合公佈吧，不會單方面開記者會，但如果是攬炒傾唔埋，侵侵一定預先爆料，推冧個市，加上如果乜deal都冇，開個記者會嚟托咩。
記者會開始後，發言人講咗重大進展幾個字，已經令人仔、美股、恆指夜期及美債倒轉頭行，只不過原來這只是過山車的高潮位，記者會都未開完，侵侵又tweet，提醒只是不在12月15日加徵新關稅，舊的仍在，此tweet立即重擊金融市場，巴黎鐵塔反轉再反轉，有外媒記者睇到個tweet後，即問中方發言人點睇，佢都沒有正面回應，只說細節日後將公佈。
當晚青冰其實想早啲瞓，不過九點就知有記者會，點都睇埋啦，沒有在專頁出post也是明智的，否則兩、三小時內出幾個突發消息，而每一個post都打倒早前那一個，吃力不討好。
總結這個似是而非的協議，大致應該係，12月15日唔加喇，但舊的仍在，中方會買優質而有需要的農產品，細節慢慢落實再公佈，難題爭拗將在次階段傾，而次階段亦會隨即展開。
早兩個月，青冰也預測過，萬一貿易有協議，那些在過去一年跑贏的股份，市場或會換馬至貿戰受害股，而巧合地在十二月強勢股全線腳軟，究竟是基金年尾獲利套現鎖定利潤，還是真的抽走資金換馬，應該要等多一兩星期才可確認，同時要配合首階段的協議內容。簡單啲講，愈利好內地整體經濟的，受害行業可喘息甚至翻生，點都會利淡早前的強勢股。侵侵玩咗兩年的套路都差不多，市場愈唱好愈要小心，諗住死梗喇又會冇事的，戰友記住勿跟車太貼。
--
