【大茶飯】全球升市的好年（青冰）

來到年尾，無論是基金還是老散，都會為自己的倉位作總結，在環球經濟麻麻的情況下，今年環球股市都算是一個好年，主要股指升兩成都係普通料，美國道指升23%，標普升29%，納指更升36%，德國及法國指數均升27%，係英國受脫歐困擾差啲，升14%，亞洲方面，日經升19%，內地滬深升34%，上證升20%，本港受自身因素拖累，只升9%，但都不是亞洲最差，因為南韓股市輸一個馬鼻，升8%。

報完一堆數據，玩開港股的，對比恆指升9%，相信唔少基金都做得到，較知名的基金，閒閒地都要升兩成，先叫做見得人。恆指表現曳，都不只是今年的事，由於金融及地產比重過高，萬一這些股份唔掂，跑輸其他地區域指數，都是理所當然，雖然香港政局動盪逾半年，但藍籌股跌得最慘的，並不是本土股，中石油(0857)全年跌20%，中石化(0386)跌16%，中移動(0941)跌13%，國際期油今年升兩至三成，點解油股咁差呢，青冰都無去深究原因，反正這些股提唔起勁去買，至於中移動呢，真係講都嘥氣啦。

簡單啲講，今年避開一些長期伏股，表現應該都唔差，但如果因為今年贏到兩成就以為自己是股神的話，青冰或要溫馨提示返，2018年唔少基金都起碼輸15%的，同年恆指跌14%，拉勻兩年來看，今年勉強只叫做補返去年的損失，係咩舊年輸咁多咩，算啦，大家都是善忘的。

去年全球都跌，今年全球都升，拉勻兩年嚟睇，玩恆指仍然要輸，滬深300指數及日經，只係倒贏返幾巴仙，唔算太叻，上證兩年來仲輸緊4%添，真正在兩年來創富的，仍是美股三大指數，三者去年跌4%至6%，今年全部贏兩三成。美股科技及創新類型股份較多，在這年代要跑贏都係應份，相反大家睇吓港股，真係唔覺有太多，市場預計來年中概股會陸續回歸，或會為市場帶來生氣，不過屆時輿論應以看淡為主，大家回想阿里巴巴(9988)回來時所見的評論，再看上市以來的表現，戰友們到時識做啦。

--

Fb個人專頁 http://www.fb.com/chingbing888