雅虎香港財經 FI專欄｜租務淡季執筍盤 業主的「面對現實價」｜千頌C
話說早幾個月前，業主就send msg過嚟，就話完咗個租約就唔續約啦，「係啦，我準備緊移民啦，想賣咗層樓呀。」呢一句說話，除咗代表香港又多一個移民盤之外，亦代表我要搵屋搬。
單位睇落一大堆，岩心水嘅冇幾多個。好啦，預著個唔錯嘅，業主企硬唔減價，ok fine，咁我咪物色過另一間。點之呢個時候，經紀竟然話「業主新收樓，企得好硬呀，不如咁，我收半佣！冇計，要跑數。」你開半佣，咁我就認真等做完野之後計計數，只係未覆佢半日啫，佢又再打嚟，「小姐，唔好考慮咁多啦，我哋免佣」嘩，個市睇來真係好差，出動免佣去打動我，不過最後搵到另一個更令我心動嘅單位。
呢個單位原本價錢就out budget嘅，但本住試吓無防心態去壓壓價。阿媽教落，講價最緊要講得比預期合理價低少少，都預咗佢還價。出乎意料之外，價都唔使還就搞掂，出奇地爽快。經紀就話「業主暑假放租，諗住租樓高峰期一定得啦，嗰時企到好硬架，但放到今日都未租。我哋早排同佢講，個市真係好差，呢區啲鬼佬expats走咗好多，又多人移民，叫佢考慮減減，所以呢個價，係『面對現實價』。」而呢個面對現實價，業主租金回報只係得2厘，仲未計差餉、地租、管理費。而業主所面對嘅現實，又點止係劈租，其實佢原先係想賣，但呢個市，賣極都賣唔去。
客觀情況係，講supply，移民潮下唔單止業主急於賣樓套現走，移民盤一大堆，亦令租盤供應增加！朋友最近睇錦繡花園租盤，個agent話依家前所未有咁多租盤，啲人走晒，咪自然多盤。與此同時，樓市已進入加息周期，唔少人為避跌市索性轉賣為租。
講demand，傳統暑假係租務旺季，旺季之後嘅Q4至農曆新年，一般都靜到冇朋友；加埋香港「國際級防疫政策」下，經濟早已內出血，變相租客個budget會揸得更緊，企得更硬；與此同時，香港「動態清零」清到外地客、expats、外地專才就快要清零，結果，連呢批一段最有能力承托租金市場嘅人都冇埋。
Demand跌，supply 升，可以預期嘅係，未來二手樓市將唔單止由租盤主導，亦由租客主導，業主仲想有高嘅租金回報率？咁要等待嘅覺悟。至於香港樓市辣招實施多年，未來減唔減就唔知，但可以肯定嘅係，政府對減辣態度多少都有啲軟化，如果真係「生意好啊」，金管局唔係都唔會喺呢個時候，下調按揭壓測要求，令入市門檻下解，變相「托市」。
最後補充返一句，我原先單位業主，最近都同返我講，「面對現實啦，唔賣住啦，租返出去算。」
Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen
