FI專欄｜也給19歲的我｜藍友斑

FI專欄｜也給19歲的我｜藍友斑

電影《給19歲的我》弄到滿城風雨，本來我想今星期入場，點估到現在連入場的機會都無。電影中的爭議已有很多報道說明，在此不贅。

只不過如果受訪者喺拍攝嘅時候，唔清楚訪問用途，呢一點其實係非常危險，張導演應該冇諗過自己嘅權威會被人如此挑戰，anyway。

作為一位中年大叔，無得入場，唯有寫一寫自己19歲時嘅回憶，緬懷過去。家貧，從小讀書都係靠自己，父母早出晚歸辛勞工作，英文都唔識多個；19歲所慶幸的是考了AL，成績尚算唔錯，順利入讀港大建築系。

讀建築除咗有勁多功課要通宵做之外，由於家計問題，所以一邊都要返工搵錢，當時大學生最容易做的兼職，首推補習；始終比起其他大學，「港大」兩個字隨時可以收貴一倍。

所以我印象中，大學生活幾乎有30%時間是在補習中度過，而我補習的學生大多是富二代，通常住在港大周邊，一是學生家長願意俾貴啲，二是近大學本部，返工放工都快手啲。

其中一名學生住在馬己仙峽道，位置大概是在楊明炒車附近，由於位置對我來說不太方便，本想推辭，點知該家庭竟願意搵司機接送我來回，於是我接了那份job。

而呢份補習job，係我印象最深刻嘅。

因為補習嘅對象係一名小學二年班學生，我當年只補CE/AL，該小孩家長，願意俾接近雙倍補AL嘅價錢去請我。試問天下間邊有咁大隻蛤乸隨街跳？我心知不妙。

呢位小二男學生係我人生中遇過最頑皮的細路，你可以想像係周星馳《逃學威龍》 那種，會經常整蠱老師、甚至乎老竇老母，非常識得扮可憐，年紀輕輕已經識一哭二鬧三上吊；小學二年班基本上都冇乜嘢好教，佢老竇都唔識教佢操行，於是搵外人（我）幫手。

我從未試過教啲咁曳咁癲啲細路，detail我不詳談，我嘗試努力過半年，最後都真係頂唔順辭職。家家有本難唸的經，你以為住半山就無嘢要愁？一樣有，煩嘅唔係錢銀，係連錢銀都無法解決嘅嘢。

我其實並無經歷太多所謂嘅「大學生活」，當年19歲嘅我，已經要為五斗米折腰，但靠自己努力賺錢，算係賺到人生第一桶金，幫到屋企人生活，有本錢去澳洲旅行，自給自足嘅感覺，其實很回味。

好多人話：人生有好多可能，我唔同意，相反你人生係有好多好多限制，如果你今年19歲，唔係含住金鎖匙，或者有咩驚人天賦，只係一個普通到不能再普通的人，出身平凡，你將會面對相當多嘅限制。

回想番自己當年19歲，絕對稱得上係活得自在，亦不覺遺憾，只係當年我考公開試出身，係大學時仍計較自己讀書不夠同學好，又經常妒忌其他人有professor照住；事過境遷，一個人的喜樂不在客觀的事，而在主觀的心。如果我現在年紀夠老，夠資格俾advice一班19歲嘅年青人，我諗最重要嘅就係「豁達」兩個字。

「我豁達，所以我唔介意俾人話我唔豁達」，人生有太多比較、競爭、陰謀、失敗，在一街都係輸家嘅世界，如果你事事介懷，心胸狹窄，就係搵自己笨。尤其是19歲的年青人，初初踏入社會，好容易乜嘢都同人比較，就算係一份intern，一個grade，都耿耿於懷。

人一旦心存妒忌，就會失去更多，如果我當年19歲明白做人最緊要豁達，一定會快樂得多。

你會問知易行難，大佬，你話豁達就可以豁達咩？豁達很難，但在一念之間。

註：專欄作者的觀點不代表本網立場。