【我係邪惡HR】HR唔係你敵人（HR小薯蓉）

喺面試過程入面，求職者好多時都要面對面試官嘅挑戰

成日見到討論區、甚至新聞出現「HR好臭寸」、「HR離地」、「HR係最廢嘅部門」、「HR可以消失」呢類型嘅標題。然後有HR上網唱衰candidate，又標籤屯門90後，我心諗，呢個行業到底發生咩事？做HR嘅網友一見到呢類惡意批評嘅文章都會send畀我睇，可見真正做HR嘅大家都忍咗好耐，一竹篙打一船人，公平咩？

當大眾見到敵視HR嘅文章，每次都會共鳴感大爆發，因而令批評HR嘅文章click rate特別高，散播亦都特別快。久而久之，HR嘅聲名日漸狼藉，全世界都當HR係公敵。人人都誓要替月行道，儆惡懲奸，呢啲敵對心態到底係點嚟？

我諗有睇過呢啲文章嘅都會發現，大部分鬧HR嘅文章都係嚟自一啲不愉快嘅見工經歷。其實有頭髮邊個想見工吖，邪惡HR成日問東問西又寸下人，又真係幾令人睇唔順眼，所以面試過程特別容易引嚟負皮。

喺面試過程入面，求職者好多時都要面對面試官嘅挑戰，而大部分人都唔會鍾意呢種被挑戰嘅感覺。每個HR喺處理呢類問題嘅手法都唔同，有啲會用婉轉啲嘅方法問你，而有啲就會好直接咁challenge你。而呢種直接嘅challenge，再加上面試官當時講嘢嘅口吻或身體語言，如果表達得較為「寸」，就好易喺人地心中留下一個負面嘅印象。

其實諗深一層，HR點解要問咁多？佢同你萍水相蓬，同你有仇咩？站在HR嘅立場，佢需要清楚你心中嘅想法、志向、性格適唔適合呢個職位，呢個係佢嘅職責。每次面試，HR其實都充滿期望，期望見嘅人係Mr./Ms. Right，因為只有請到人，佢先可以完成佢嘅工作。如果佢對你Hea問Hea做，反而對你、對公司都唔係一件好事。

講到尾，互相尊重最重要，雖然可能有HR做得唔夠好，但都有好多HR其實好專業，唔能夠一竹篙打一船人，抹殺佢地嘅努力。

做咗HR十多年，由薯仔做到變薯蓉。HR係咪高高在上？又廢又冇野做？查實我地幾分傷心幾分痴，有苦自己知！見盡奇形怪狀CV、見工奇行種、各式各樣嚇死HR事件，深明做HR嘅辛酸。2015年開設Facebook個人網誌「HR小薯蓉」，2017年出版《我係邪惡HR》一書，分享作為HR的所見所聞。

HR小薯蓉Facebook專頁：https://www.facebook.com/hrpotato

HR小薯蓉網誌：http://www.mashedpatata.com/