iPhone 16都救唔到先達 198萬買舖都捱價

昔日被譽為iPhone交易所的先達廣場，今時今日已湧現吉舖。

iPhone 16登場例牌成為全球話題，不過昔日被譽為iPhone交易所的先達廣場，今時今日不單交易所不再，舖位身價一跌再跌，數月前有舖位以198萬元易手，買家現在恐怕要捱價。

下載Yahoo財經APP

美股外幣即時報價 多國新聞任睇

三折買舖變接火棒？

早年每當有新iPhone推出，先達都會出現放機買機人潮，此盛況近年已不復見。先達近年已湧現吉舖，今年4月更出現一宗震撼成交，原業主在2011年斥838萬元買入120方呎蚊型舖，耐性持貨逾13年，最終以198萬元成交，勁蝕640萬元，貶值幅度達七成半。

2023年中先達已出現狂蝕成交，當時81方呎超迷你舖以300萬元易手，原業主於2012年以865萬元買舖，持貨11年勁蝕565萬元元。相隔不足一年，198萬元買到120方呎，看似執到「筍貨」，但近日先達一個銀主舖放盤，或會令先達舖位身價再插水。

該銀主舖位於先達2樓，面積達176方呎，較上述兩個舖面積大一截。現時銀主開價僅68萬元，呎價3,864元，假如成交價百多萬，先達舖位身價將再創新低，四月以198萬元買舖的買家恐怕會持有蝕本貨。

除了2樓的銀主舖，月前先達地下亦出現銀主舖出售廣場。

鏟平先達係終極希望？

蘋果在香港有六間大型零售店，Samsung、小米專門店亦越開越多，至於手機維修小店，各區商場都不難找到一、兩間，消費者買機整機都未必要跑到先達，加上內地消費疲弱、港元匯價高企等因素，先達要再次成為iPhone交易所有相當難度。

昔日的手機產業不振，令先達舖位身價插水，要找人接手唯有靠平，假如持續出現銀主舖，舖價就更難扭轉低水頹勢。

幸好先達舖主尚有一終極希望，市建局在2021年9月發表報告，建議重新規劃油麻地、旺角等舊區，其中先達廣場就被納入發展範圍。不過這類大型規劃由研究到落實動輒以十年計，先達及樓上大廈是否需要拆卸或活化翻新仍是問號，要持貨至終極收樓，先達舖位業主既要有耐性亦要有強大的持貨能力了。