KingSir傾樓│四個原因買凱滙(葉景強)
「打疫苗送凱滙」大抽獎,已於上星期開始接受登記,參加者只要是年滿18歲香港永久性居民,於9月1日或之前完成接種兩劑新冠疫苗,就有資格抽獎。
早前有學員詢問筆者有關此樓盤,他說:「真係好鍾意呢個單位,真心希望抽得到,但如果抽唔到,現在呎價已經升至兩萬三四,今天還買得過嗎?」我同個學員講:「到時可能有成三百萬人去抽一個1,080萬嘅單位,除開每人都只係分得果$3.6,即係嘥氣!如果真係鍾意就唔好再等,現在就去買啦,未來仲有得升!」
美股、外匯、加密貨幣免費即時報價,自選投資組合獲取相關新聞提示。
點解我咁睇好?原因有四:
1. 樓盤設計好質素高
首先利申,筆者早於2018年尾開售時以$17,000/呎購入一單位,上星期剛收樓。收樓時發現這樓盤無論手工用料質素都非常之好,而我最欣賞的地方就是其以「城市綠洲」的設計,整個屋苑滿佈花草樹木,當你置身於其中,完全感覺不到自己正身處在觀塘鬧市當中。
2. 周邊配套完善
樓盤與港鐵站近在咫尺,未來還會有天橋直達,住宅基座還設有全港首個室內空調智能公共運輸交匯處,內有8條巴士線及21條專線及公共小巴路線。屋苑對面就是大型商場apm,購物飲食娛樂一應俱全,另外隔離的第4及5期將發展建成一座高280米、集寫字樓酒店及商場於一身的摩天大廈,未來將成為新地標,整個觀塘將煥然一新。
3. 區內唯一大型新屋苑,租務需求龐大
觀塘屬早年發展的舊區,是全港人口密度最高的區份,區內大量分支家庭,很多家庭已仔大女大,子女大多不想與父母同住,但又不想住得太遠,方便照應,因此對新樓有着極大需求。另一方面,政府近年銳意將東九龍打造為CBD2,區內逐步轉型為商貿區,大量甲級寫字樓落成,高薪上班一族對新樓租盤渴求殷切。
4. 抽獎提高樓盤知名度。
你層樓能大升與否,其中一個因素就是有多少人認識,只要越多人識,未來升幅就越大。龍頭屋苑太古城相信無人不曉,市民對其交通生活配套亦有一定了解,如你是中產又是在港島區上班,當有天你想在東區租樓或置業的話,相信第一時間你會諗起太古城。相反,一些講你都唔知喺邊度嘅樓盤,如清水灣道8號(不是在清水灣而是在彩虹站上蓋)、峻弦(斧山近牛池灣公園)、朗逸峰(荃灣半山),你又點會去租或買呢,需求少升幅自然慢。
今次信和送出單位抽獎,之前好多人都唔知個盤喺邊度,而家相信連牛頭角順嫂都知啦,咪就係壓軸大抽獎在觀塘嗰個樓盤囉!
葉景強(King Sir)
本欄逢周五刊出