香港股市 將在 2 小時 57 分鐘 開市

Market Insight:五窮六絕七反艇

東方日報
港股走勢一浪低於一浪,市場投資情緒自然欠佳。

近期港股走勢呈一浪低於一浪,且成交縮減,反映無論好友淡友,呢啲位都係意興闌珊,沒有多大作為的意欲。一方面,恒指唔使一個月由高位30,280點回落至上周低位27,169點,隨時可作反彈,所以呢啲水平淡友傾向等一等再沽;另外,中美貿戰進度未明,唔知美國幾時又會出招,好友連番受挫後如今已沒多大鬥志。結果魚缸一潭死水,水盡鵝飛,今個「五窮月」是名副其實的「窮」!

「五窮」快完,「六絕」將至,到底港股六月會有幾「絕」,在下同大家一樣,都唔多願意去想像。事實上,環顧一眾重磅股,過去一段時間充當大市上升動力來源的手機設備及科網股,走勢都係差到冇朋友,尤其以呢期芬佬沽騰訊控股(00700)之狠,別指望班大戶會喺短期內掉轉頭買番貨。

內銀股唔頂得幾耐

香港本身的傳統經濟板塊,如地產股、收租股,在經濟景氣差的背景下,都係陰陰落。再睇啲所謂內地國策板塊,兩隻藍籌藥股呢期表現「股如其名」的「弱股」,彈完再散,即使最新公布的經營數據唔差,都要照跌;至於汽車股,上周傳來關於內地公布汽車購置稅的具體安排,車股的反彈幅度都係一般,其中吉利汽車(00175)在高位沽壓湧現,尾市升幅收窄。

老實講,呢期唔係靠啲北水托住內銀股,睇怕恒指早已失守27,000點關。但老古相信,內銀股都唔會頂得幾耐,皆因外資不斷撤出內地,意味不少小微企業都要跟住倒閉。今年以來一直受國策所託要借多啲錢畀民企的內銀股,嚟緊啲不良貸款和壞帳比率唔知點見人,加上內銀股屬周期類股份,內地經濟唔好,內銀股可以有運行嗎?再講,呢期內地當局力托人民幣,以應對六月半年結的流動性緊張風險,不過若然貿易談判沒正面進展,未來公布的經濟數據亦唔見得可以支持人民幣匯率,相信最終國家隊還是難敵市場力量。人民幣一旦再貶,內銀股勢首當其衝。所以,若短期內市況有反彈,會留意開內銀股淡倉的機會。

六月底中美元首會在日本舉行的G20峰會會面,屆時若冇好消息,便是壞消息,則港股在「五窮六絕」過後,唔係「七翻身」,係而「七反艇」,向下直望25,000點水平。

中資公用股存風險

睇來睇去,短線仍留在魚缸避險的,除咗游走於高息避險股外,冇咩好做。繼領展房產基金(00823)和中華煤氣(00003)股價迭創新高過後,上周五見到有資金流入中資公用類股,如粵海投資(00270)、中國燃氣(00384)。之不過,短線投資氣氛實在不利人民幣資產,揸中資公用股,最擔心都係受匯率風險,怕一個浪打埋嚟,收息唔夠蝕價。所以,沾手相關股份,仲係見好識收,免得接火棒,投機唔成變投資!

古勝