香港股市 已收市

Market Insight:內銀股靜靜起革命

東方日報
中資金融股有條件帶領中港兩地股市再升,可選龍頭內銀股。

內地股市在豬年首個交易日做好,中國人最重視意頭,咁新年升市收場算係開個好頭!正常而言,宏觀經濟挑戰大,意味股市基本因素偏淡,後市未許樂觀。然而,對於中國市場,向來不能用慣常的一套標準來分析。

內地經濟愈閉翳,A股就愈要維穩,即係唔跌得!所以話,今年並不適宜做淡A股,這亦變相為香港的中資股一定程度打了個底。

淡友散戶暫按兵不動

大戶明知不能逆內地高層意志行事,唔能夠做淡,就惟有做上。故見年初以來,不少資金流入有所部署,否則恒指難以上到現時28,000點水平。咁到底幾時先至可以反手沽?暫時而言,散戶投資者最好還是按兵不動,待恒指突破250天線28,386點,相信屆時可以睇情況部署逢高分注沽都未遲。

港股昨日收報28,143點,升197點,叫做站穩28,000點樓上,主板成交881億元。有消息指,中美元首或於三月中會面,意味中美貿易談判仍有機會達成協議。當然,三月初限期前不無變化,昨日又傳來美國驅逐艦駛入南海具爭議水域。可見一日未落筆簽字,美國都會繼續耍手段,以圖着數攞到最盡。大家炒還炒,仲係要量力而為,綁緊安全帶!

藍籌股中,昨日最醒神係兩大手機設備股舜宇光學(02382)同埋瑞聲科技(02018),股價同升逾半成收市。同樣喺去年行霉運的吉利汽車(00175),股價亦飆半成,三隻股份升勢都有成交支持。

弱勢藍籌能夠持續發力的原因之一,乃相信後市仲有得升,吸引部分資金追落後。反正唔信後市會升,都咪急於開淡倉。

若然後市真係繼續上,會由咩股發力?一定唔會少得騰訊控股(00700)及中資金融股。騰訊去年末季業績差,早已在市場預期之內。展望今年,政策逐步明朗化,雖然股價未至於可以重上去年初高位,但相信主要波幅區有望上移至320至380元區域。三月公布業績前,會否陸續有資金進場部署,不妨等着瞧。

領展先食胡 候低回補

至於中資金融股,嚟緊業績期,消息方面有機會略較預期好,且息率有保證。再講,若然A股後市向好,內銀股升勢不可或缺。

見到幾隻大型中資券商股股價經已靜雞雞重上牛熊分界線,相信內銀有條件發力,追貨唔大唔買,睇實工商銀行(01398)及建設銀行(00939)。

反而,若看官揸住領展(00823),不妨諗諗短線先行獲利,皆因嚟緊有立法會議員會提案,話要規管公屋商場租金及續租條件等等,似乎都係針對領展將公屋經營商業化而來。若然相關提案獲通過,變相令領展盈利能力打折。既然領展處歷史高水平,可先食一轉,候低再作部署。

古勝