香港股市 將收市,收市時間: 5 小時 42 分鐘

Market Insight:公用股展現防守力

股市避險選擇,一定以公用股為先。(資料圖片)

【東方日報專訊】眼前最大危機似是打仗,但實際上即使擦槍走火,都未必會對宏觀經濟造成太大影響,畢竟美朝實力太懸殊,美國真的對北韓開拖,都唔會拖得太耐。反而,地緣政治不穩對金融市場造成震盪,再加上聯儲局好大機會在九月退市及年內再加息一次,兩者同一時間出現,就有機會引爆金融危機,觸發點好可能在債市。

再度發揮避險作用
事實上,現時歐元區的「垃圾債」息率低至與美國十年期債券息率相若水平,說明債券市場泡沫已去到一個極點,一旦爆發,恐怕難以收拾。

如果真係驚第三季港股走勢大逆轉,揀股應該重視息率及現金流。以一五年大跌市為例,公用股中電控股(00002)當年的高低位分別在69.8元及62元,差極都有個譜;港燈(02638)更逆市上升,由一五年頭的5元邊升到年底的6.5元水平。

不過,古勝要補充一點,當年跌市息率仲係處於超低水平,但現時美息已重拾上升周期,加息對公用股有負面影響,所以呢個世界冇話一本通書睇到老,要懂得隨機應變。

暫時而言,再加息可能是年底的事,短線市況大幅波動,公用股仍可起避險之效。在「公用三寶」中,煤氣(00003)息率得2厘,值博率較低。

開戰陰霾困擾股市
恒指周線圖四連升喺上周終於斷纜,由八月九日高位27,876點回落至八月十一日低位26,863點,足足唔見成千點有多,畢竟連續一個月的強勢,都係平常心看待調整市的來臨!

有別於單邊市齋坐貨就贏錢,由於外圍不明朗因素增加,加上港股今次大升浪才剛開始調整,有心理準備,本月餘下時間市況將持續波動。若然持倉不多,唔想擔驚受怕炒波幅,可以去轉短線旅行,等恒指落到50日線26,344點附近,再作部署。

照計,美國經濟增長正在提速,呢個時候「侵侵」若真的對北韓動武,唔多唔少會損害本土經濟氣氛,想速戰速決,不無變數,所以一般估計美國都係靠嚇居多。反而北韓方面令人擔心,萬一真係襲擊關島,美國必然要出手,到時國際形勢急劇變化,冇人能估到後果會係點,從呢個角度睇,離場觀望係最自保的方法。

內銀股承接力受考驗
中國移動(00941)上周突如其來的廿周年特別股息,支持股價表現,但在大升市其股價一直落後,到升市掉頭向下先至發力,故被指為「藍燈籠」,即到佢發力大市玩完!

現金流穩定利好中移
到底係咪真係咁「燈」,古勝唔敢下定論,但以中移的業務現金流可觀而穩定,今年以來股價落後大市,照計股價有一定的抗跌力,下半年須留意分拆鐵塔公司上市以及同業混改的進度。

上周中資金融股都要捱沽,無他,流動性高自然成為提款對象。短線炒作,唔好理咁多,反正到止蝕位就要執行紀律。若作中長線持有,以上半年內地經濟數據而言,嚟緊中資金融股公布的業績消息應該不會差,照計又未須要太過悲觀。五大內銀股中,工商銀行(01398)股價表現相對強,短線5至5.2元有一定的支持,就睇實龍頭股的承接力。

當然,若地緣政治風險急升,繼而令A股及人民幣匯率出現大幅波動,那內銀股亦唔會有運行。只係如果去到咁惡劣的地步,反正都係跟大隊,亦無話可說。參考一五年大跌市經驗,一日阿爺做大當家,有實力肯坐,內銀股亦有望鄉日,總之短線摸着石頭過河。

古勝