香港股市已收市

Market Insight:電動車股去蕪存菁

內地有意提升電動車行業的規劃發展。

【東方日報專訊】A股是否入摩,今日凌晨就有答案,昨日港股屏息以待,上晝上過26,000點又回落至25,800點徘徊,成交唔到700億元。

昨日古勝睇到一單地產新聞,話新鴻基地產(00016)喺西貢十四鄉有個大型發展項目,建築圖則已獲屋宇署批出,料整個項目將獲批建30座洋房及46幢分層住宅,提供多達4,700個單位,猶如一個社區,單位數目等於「奧運三寶」九成,真係一啲都唔細。

新地守118元可小注
雖然未知補地價金額多少,但呢個大Project日趨成熟,點都可以為新地估值加吓分,但奇怪係尋日新地股價冇大異樣,收報118.1元,僅微升0.08%,短線繼續企穩118元區域,可以考慮小注。

近日市場盛傳,內地將暫停審批純電動車生產資格。事實上,呢年幾發改委大大話話已批出約15張純電動車牌照,由於開初所設的門檻不高,如今當局考慮到行業規劃發展,想提高行業水平,係時候檢討發牌數目,做好現存的營運者,都係合情合理。

若然消息屬實,一方面類似樂視等意欲發展純電動車卻仍未獲發牌的企業,可能暫難參與其中;另一方面,現存已獲發牌的營運者,將會去蕪存菁,成為當局重點栽培的新興車企。

是故,要發掘新興車企明日之星,不妨從現有已獲發牌的純電動車企名單中尋找對象。

呷哺呷哺提防被空襲
昨日古勝喺東網Money18網站「即市推介」講到下一隻可能被「空軍」瞄準的股份,就係內地火鍋連鎖店呷哺呷哺(00520)。呢隻股喺一四年上市,一路未有點大炒過,計埋大股東同上市前入股的私募基金,揸咗七成幾貨,收乾收淨。

直到今年三月底,其股價開始起動,由5.5元水平反覆向上,並且升至上周配股前的高位8.75元。

上周有股東以折讓逾一成的價格配售5,000萬股股份上板,由於權益披露未見主要股東減持,意味係街外投資者沽貨,折讓大,反映呢隻股長期冇動靜要搵人接貨都唔容易。至於話咁快股價就失守配股價,反映今次配股可能配散咗。

再看上周沽空有異樣,話唔定有淡友睇中佢咗。之後會唔會演變成大龍鳳,就睇好淡角力。正所謂沙塵滾滾、殺錯良民,都係作壁上觀為妙。

酒店股最好分注食胡
查實入唔入摩都只係短線影響居多,最緊要港股市底並唔弱。古勝仍然相信,七月前恒指會繼續高企,以迎接回歸二十周年!

炒H股唔使等入摩
老實講,若然睇好外資買A股,為何不先從AH股入手,一來香港H股的估值相對便宜,二來息率又普遍吸引,相信無論大戶定小戶,都唔會捨易取難。昨日AH股份中,馬鞍山鋼鐵(00323)、鞍鋼股份(00347)、東方航空(00670)以及中國鋁業(02600)都逆市做好。

現時H股較A股有溢價的AH股有福耀玻璃(03606)、安徽海螺水泥(00914)及江蘇寧滬(00177),嚟緊可以留意吓內地金融股同中石化(00386)。

此外,記得喺六月七日,在下已同各位看官講要留意酒店股,點知上周異動整固過後,本周又再起動,昨日股價創新高的酒店股有大酒店(00045)、美麗華(00071)同富豪酒店(00078),都真係好耐冇見個板塊咁熱鬧。不過,短線累積升幅唔細,有買到平貨,建議趁高分注食胡,短炒袋袋平安最實際!

古勝