Netflix與煤氣的「亂章」智慧
疫情衝擊環球經濟,企業公布好消息股價都照樣跌跌跌。咁嘅環境,識得玩的企業就不妨打「亂章」,以表面睇唔太好的消息為刺激股價舖路。
第一個例子係Netflix,Netflix剛公布為回應歐盟呼籲,將降低串流影片畫質30日,以紓緩歐洲多國網絡塞車情況。據悉近日意大利家居寬頻用量急升75%,英國網絡使用高峰時段亦由中午一直伸延至晚上9點。Netflix這一著雖然可以火速回應歐盟呼籲及令更多宅在家觀眾可以順利欣賞串流節目,但畫質降呢牌面睇似乎多少有點打擊企業形象。不過諗深一層,Netflix這一著點出自己係令歐洲網絡塞車的原因之一,投資者會解讀為Netflix勁多人睇,自然進一步鞏固Netflix係歐美抗疫宅經濟概念股地位,之後其他串流巨頭即使照跟,都未必有相同效果。
第二個例子係煤氣,四叔(上圖)主政年代煤氣長年例牌十送一紅股,但今年就縮水為二十送一。消息公布後,有煤氣長情小股東抱怨煤氣換莊後係咪走樣,但諗深一層,現在股市氣氛差,即使係公用股有好消息都可能照跌,倒不如趁這機會先做期望管理,把紅股派送比例縮小為二十送一。這一著的確會令煤氣股價受壓,但因為仍然會派紅股,出現崩壞式下跌情況機會就較小。煤氣適度調整股價,亦方便四叔家族以較實惠成本增持加固控股權,當疫情過後宣布回復十送一紅股兼增加派息,就可以火速重拾投資者歡心。
每逢較長的熊市周期股市都會多怪事,甚麼大股東失蹤、大折讓供股、忽然停牌復牌無期等戲碼可能會陸續在股市上演,相比之下,以上兩個「亂章」例子,其實已經算充滿正能量了。
===============
精選資訊網站「中環街市」 臉書粉絲頁