香港股市 將在 5 小時 3 分鐘 開市

【異動尋寶】高銀撻訂的深層意義(魏力)

近日講股票無市場,不如都係唞唞,拎單新聞出來講吓。昨日最爆莫過於高銀(530)以市況急速轉壞為由,怒撻去年11月奪得的啟德地皮,如無意外,會畀政府殺訂25球。

高銀通告是咁的:6月10日,公司應獨立非執董石禮謙議員要求,召開緊急董事會會議,討論啟德地皮的發展問題。會上,3名執董、3名非執董都認為,「近期發生的社會矛盾和經濟不穩定,將可對香港商業地產市場的增長產生負面影響」,故此贊成撻訂止蝕。

不過,主席潘蘇通就「強烈表示」,唔認為會有影響,仲有信心新地皮會帶來協同效應添!好可惜的是,投票遊戲規則是「小數服從多數」,所以最後都係通過含淚撻訂。

睇到呢度,看官應該有幾個疑問:

一、係咪唔夠錢找數,所以賴落「逃犯」?通告就強調,係夠錢找數。再翻查資料,去年6月,高銀將旗下高銀金融國際中心,抵押予長實(1113)旗下公司,借入102億銀,除非呢幾個月成筆錢「唔見咗」,否則應該唔會因為唔夠錢而撻訂。

二、為何通告咁強調係石禮謙議員call會呢?需知道石議員係出哂名的「獨董王」,參考去年6月一篇媒體報道,石議員係15間上市公司的獨董,仲有立法會九萬幾個會,可謂日理萬機,何解對一幅地皮咁上心?

又google一下,石議員係來自「地產建設界」功能組別,對地皮特別上心/敏感,係十分合理的事(一定係,除非唔係)。再講,石議員係「逃犯」法案委員會主席,對法案通過的威力,相信是非常清楚。因此,石議員咁急call會撻訂,顯然是知道修訂一通過,地產市道將會好大鑊,將來損失會遠多於25球,才會「與時並進」,忍痛撻訂。

三、高銀投地筆錢可以話係問「誠哥」借的,而石議員又係「地產建設界」議員,今次石議員出手,莫非收到「米飯班主」的柯打,要用撻訂來發出一個訊息?呢個問題,留畀大家自己諗。

www.facebook.com/2012jason