雅虎香港財經 【異動尋寶】港股缺水 問題出在哪？（魏力）
炒友成日講的「五窮六絕七翻身」，今年未能應驗，取而代之係「五插六彈七死魚」。日日坐在報價機面前，除了悶、還是悶，只要有趨勢，升跌都有得做，但個市乾塘唔郁，就神仙都難救。等完科創板，又輪到等下週美國議息，之後就中美談判，無限輪迴，問你死未？
歸根究柢，係市場唔夠水，企業負債纍纍，齊齊等央行放水打救，一放少少水，就一窩蜂湧去發債抽水(例如內房)，變成點放都唔夠，咁邊仲有錢流去股市？要紓緩乾塘問題，惟有大刀闊斧減息、印錢，全球大部份央行都想做，但都要睇美國頭。點解？假如美國唔帶頭做(例如月底減息半厘)，只要是旦一個央行劈息，貨幣兌美元就會大貶值，咁借美元債的企業咪PK？
所以，要上演環球大放水，主角仍然在美聯儲，但近日官員言論暗示，月尾只會減四分一厘，咁其他央行出手就會勒住勒住，變成放極都缺水。
Update番近日推介，聯塑(2128)已全吃；中聯重科(1157)、比亞迪(1211)、美團(3690)、聯想(992)繼續持有；亞洲水泥(743)、中梁(2772)已斬。
板塊方面，內房、物管、水泥股轉弱，暫時避一避；5G、手機股近日轉強，可留意相關龍頭股，如舜宇(2382)、丘鈦(1478)。最新券商報告指出，手機股不明朗因素漸散，下半年業績可望復蘇，加上華為限售令鬆綁，可成短期催化劑。此外，龍頭藥股如藥明生物(2269)、中生製藥(1177)強勢盡現，如回調至10天線，不妨一試。
