【異動尋寶】即日有糊食的例子（魏力）

港股連隊六日後暫時喘穩，週五開始停北水，大媽都已收疆，成交會逐步陰乾，樂觀睇係有機會乾挾，但真係出現的話，應該是趁機沽貨，而不是亂咁衝。大陸放完假之後，就開始中美貿談，唔似會有嘢傾得成，到時又係加關稅、隻揪的時候。

昨日早段本來好悶，但有傳新一輪藥企「帶量採購」下週公佈，拖累一眾藥股急跌，帶來低吸的機會，目標是中生製藥(1177)及石藥(1093)，而即市1個小時左右，已有8%左右回報。

呢兩隻為大型「仿藥」企業，受壓價的影響最大，但值得撈的原因，是因為去年推出第一輪「帶量採購」之後，市場對此早有預期，而10月份推出第二輪亦是一早已知的事，所以才會見到「聰明錢」早於兩星期前已開始撤退，而目的自然是為下一次低吸作準備。如今事件曝光，市場恐慌，正是出手的好機會。

美銀美林報告亦指，帶量採購擴大至全國，對行業的正面影響將較預期多，皆因措施將由藥廠配合降價，改為選取三家低價的中標者，意味這三家藥企可先達成價格協議，毋須大力減價，預期今輪降價幅度只有約20%，較上一輪溫和得多。

「隻股票急跌時，點先知道係時候撈得？」這當然牽涉一些技術分析的技巧，有跟開小弟IG分析post的話應該會get到，不贅。

藥股以來，其他板塊基本上乏善可陳，手機股狂衝後抖緊氣，無貨亦唔需要急住撈；汽車股炒復蘇，但亦未有新催化劑，又係停係度等運到。只於資源股因強美元再次受壓，短期亦難有大作為。近日吸引好多散戶落場炒的美團(3690)，昨日繼續go go go，心理大關在80元。但要留意，9 RSI已三頂背馳，反映動力不足，有食要食，否則一個回馬槍，可以去番74.5元附近。

筆者為證監會持牌人，持有中生製藥及石藥財務權益。

www.facebook.com/2012jason