【異動尋寶】兩幅「餅印」靚圖股（魏力）

恒指在26700附近造旗等突破，悶到反艇，睇牛熊街貨分佈，熊仔佔53%，唔算好一面倒，但以重熊區來計，熊區較近而集中，牛區則較分散，照計下週美國減息，「硬脫歐」機會又顯著下降，大陸又逆回購放水，點都係賭上較具值博率。

另一角度分析，期指下週三結算，現時尚有6個交易日，而上月轉倉位26000計，本月波幅相當細，絕對有條件再行高一點。睇就係咁睇，但操作都係要等訊號出現先做，爆穿26900再入場勝算較高。27000至27300有多達2400張期指的熊仔街貨，暫時睇到呢個位先。

個股方面，熱炒股、破頂股紛紛回氣，部份一棍就落半成。其實，升得多就回，是股票運行定律，無必要太擔心。炒股通病係太在意個價，有賺的時候，一支陰燭就震走；相反一買坐艇就會死守，仲越跌越溝。贏粒糖、輸間廠，就係呢隻炒法。這些不過老生常談，但卻是知易行難，無計，人性也。

蘋果股價創新高，加上內地同業季績省鏡，帶動瑞聲科技(2018)大陽燭破位。魏力IG週一已經出圖講咗，大型頭肩底，即將破位。也有粉絲睇完就偷步買牛，翌日賺了不少。圖表上，下個阻力介乎54至55元。

手機設備股見底，有來9月份講座的朋友，應該已經知道，之後就係考驗耐性，坐到業績好轉、開花結果。行業首選仍是舜宇光學(2382)，目前在行range，112至120元，突破120蚊再上車，買貴幾蚊，但唔使捱咁耐。

另一隻想講吉利汽車(175)，幅圖同瑞聲非常相似，也是頭肩底突破，下個阻力15.2元。魏力會繼續持有廣汽(2238)，博的也是行業復蘇。

筆者為證監會持牌人，持有舜宇、瑞聲及廣汽。

www.facebook.com/2012jason