SPAC登陸香港 KOL成搶手貨

SPAC較獨角獸企業上市更擺明係賣「概念」、「故事」

誠哥、澤楷、鄭志剛都玩SPAC，連財爺都透露將SPAC引入香港，一旦成事，唔同界別的KOL就可能成為搶手貨。

牽頭團隊要有號召力

傳統企業招股上市模式係先有業務，再招股集資上市。SPAC就係倒轉玩，第一個關鍵階段以空殼公司招股集資上市，第二個關鍵階段係宣布併購目標，完成併購後，SPAC就正式由虛變實。

SPAC較獨角獸企業上市更擺明係賣「概念」、「故事」，所以SPAC牽頭團隊號召力就成為成敗關鍵因素。現時最主流的牽頭明星係風險投資家、超級富豪及星級科企前CEO，隨著SPAC熱潮升溫，亦有唔同行業的名人落水，例如退役棒球明星Alex Rodriguez就與對沖基金計劃成立SPAC集資5億美元。

誠哥、澤楷、鄭志剛都玩SPAC (TPG via Getty Images)

廿年前香港科網狂潮，其中一個怪現象係唔少娛樂圈名人都忽然成為創仔板科網股高層。按SPAC講求號召力的遊戲規則，假如在港掀起SPAC熱潮，就唔單止係娛樂圈名人，唔同界別的KOL都有望成為SPAC市場搶手貨。

找項明生夾陶傑代言郵輪

例如旅遊產業估值跌入谷底，有SPAC以旅遊項目如渡假村、旅遊服務平台等為收購目標，旅遊達人KOL就可以獲邀成為牽頭團隊成員之一，項明生夾陶傑話唔定可以搞郵輪SPAC。另一低估值產業餐飲業，有SPAC想以平價接手餐飲集團，搵飲食KOL或星級名廚加入牽頭成員亦順理成章。

旅遊達人KOL例如項明生，就可以獲邀成為牽頭團隊成員之一

疫情期間大家勤學烹飪，亦令一班烹飪KOL彈起，家電股如JS環球生活報盈喜，證明小型家電業務有得做，或吸引有SPAC以進軍家電業為目標，烹飪KOL就有機會由煮食界轉戰財經界。

不如「試當真」SPAC

最近熱議的電影工業，金融KOL渾水豪擲15萬撐「試當真」游學修；事實上渾水也不必付錢，直接助「試當真」SPAC併購（HMV數碼中國集團？有線寬頻？）企業後開戲，授之以漁，豈不更妙？

KOL條件之一係行出來好睇，呢項條件最有優秀係美容及健身KOL，美容產品及健身服務都係大家有興趣又容易理解的產業，亦有機會成為SPAC集資的「主題」，美容或健身KOL同樣有機會成為搶手貨。

姜B基本上加入任何年輕「主題」SPAC也可以

當然更百搭都係人氣明星，例如幫緊老麥賣包的姜B，基本上佢加入任何「主題」的SPAC，相信他廣大fans都會受落吧。

相關報道：

• 陳茂波指正研究推出SPAC在港上市

• 新世界發展鄭志剛據稱正在醞釀規模或高達4億美元的SPAC

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。