Tesla「前賣券」可能係救市水泡
除了找換店同移民公司,近來各行各業都係一個淡字。但政府發行一萬元快將登場,企業想賺一轉快錢,不妨向Tesla及內房學習「前賣券」智慧。
本地片商多年前已引入日本的「前賣券」模式,在人氣大片上映前先預售附贈限量禮品的換票證,只要套戲夠號召力,這類「前賣券」通常都可以極速沽清,讓片商可以預先套現一筆資金。
在汽車市場,Tesla算係將「前賣券」模式玩到出神入化的企業。Tesla每次推出新車款,都會先讓買家支付一千蚊即可預訂,由於入場門檻低,結果每次都吸引數十萬名買家落訂,之後就係漫長的等待。由於等待時間長達兩、三年訂金又平,買家通常都會懶得退款,到真正有貨時,終於有貨的驚喜亦往往會促使買家完成交易。Tesla此策略既可以鎖定大筆訂金,訂單的驚人數字又可以催谷股價確實係一舉兩得。
至於內房,除了網上打折賣樓兼讓買家只支付幾千元人仔訂金,另一玩法係在直播平台以幾蚊或幾十蚊推銷價值數萬元的買樓優惠券,難得搶到優惠券,相信不少買家都會用出手買樓,如此內房又可以賣多幾萬個單位了。
本地唔少範疇企業都可以引入「前賣券」方式刺激生意,例如賣電器,即使今年你唔打算換冷氣,但看到五十蚊可以當500元使用的冷氣「前賣券」,都可能心思思想買定先留待明年換冷氣用。當然如果明年你無咗件事,電器零售商就賺盡這五十元。生意大受打擊的酒店,亦可以率先預售自助餐「前賣券」,皆因唔少人都餓了自助餐多時,看到有七折發售的自助餐「前賣券」,都憧憬下一季可以安心享受自助餐的好日子而乖乖付款。
生意陷入谷底的航空公司已瞄準「前賣券」商機,積極以平價推出可以任改出發日期的預售機票。本地交通企業面對客量跌唔停困境,亦不妨向航空公司學習進取一點,以折扣價預售下半年甚至明年的搭車月票,始終唔少人都要繼續搭車返工,見到月票有折可能都會心動,有了這筆特殊收入,交通企業盤數都會像樣得多吧。
===============
精選資訊網站「中環街市」 臉書粉絲頁