Tim Cook要救蘋果 或要阻止巴郡回購

貿易戰再開打，唔少人又再睇淡很依賴中國製造的蘋果，摩根大通更出報告指蘋果今年新iPhone要被迫加價14%，一旦成真，Tim Cook今年的大任務可能係阻止股神旗艦巴郡的千億回購大計。

從現時吹風的今年新iPhone設計，最大突破係由兩鏡變三鏡，其餘就可能係餡料例牌升級，連唔少人期待的5G版，據悉最快要明年才有望推出。經過去年iPhone的價格震盪，市場證明高價策略行唔通，如果新iPhone設計再次係擠牙膏式改進，正路睇無乜條件繼續貴賣。但摩通報告就指出，以iPhone毛利率三成七估算，iPhone要加價一成四才能夠抵銷關稅影響，即係iPhone繼續中國製造的話，就唯有焗住貴賣策略。

假如摩通不幸言中，睇怕主流iPhone用家會選擇唔換機。如果唔追新款，iPhone使用周期可以至少長達六年，指標係2014年大熱機款iPhone 6，直到今年才可能被踢出新版iOS支援機款之外。更何況一些長情用家係寧願唔更新iOS都要繼續用陳年款iPhone，筆者就認識一名富家子仲用緊iPhone 5，皆因這部機是他與另一半的定情禮物。

當蘋果用兩年時間教識用家唔追款，iPhone新機吸金力只會加倍失靈，股價受的衝擊將會更厲害。頂尖的CEO當然識得居安思危，Tim Cook今年出席巴郡股東會，明顯係討好股神這名大股東的外交動作。

既然股神講明缺乏投資目標倒不如用千億美元回購巴郡股份，一旦蘋果股價又大減價，Tim Cook就順勢溫提股神價廉物美投資目標就在眼前，撥五百億掃蘋果，這枝強心針至少頂到一、兩季，當印度及其他國家生產線擴充完成後，就可以紓解中國製造帶來的加價壓力吧。

===============

精選資訊網站「中環街市」 臉書粉絲頁