【樓市贏家】移民急讓 有冇筍盤執？（徐峰）

過去半年，全香港焦點是一連串越演越烈的反送中運動，在此先不談大家的政治取態，但無論你是撐哪一邊，不能否定的是，過去半年香港正陷於一個亂局，筆者身邊不少朋友都有移民的打算，而如果你有留意，其實近幾個月都有部分業主急於移民而減價放盤甚麼蝕讓的新聞。

其實早在8、9月左右，有日筆者收到一個朋友的消息，一個本身居住新加坡的朋友，早十幾年前同老公來港定居，一直打算長住，但忽然間話要返新加坡，還走得相當之急，就連原來居住的半山物業，本身打算翻新後出租，結果都要交由親戚代勞，可以知道在某些人心目中，有多想即時離開香港。

有實力的人，有本錢留起層樓收租兼等升，但如果是實力較為沒那麼雄厚的呢？可能就要賣掉手頭物業才夠資金離開香港生活。或者對香港前景睇得較淡的，則信奉cash is king的道理，可能會選擇在離開香港前沽出物業。

所以呢，近期久不久都會見到有人話要移民而出售物業，部份甚至會蝕讓出售，好似早幾年房協出售的「港人港樓」喜漾，早陣子就出現首宗蝕讓，一個海景三房單位以1238萬元售出，雖然較原業主2015年購入價1202萬元仍有賺，不過，如果扣除使費，就倒蝕約20萬，據經紀所講，原業主是因為計劃移民才願意蝕使費出售單位。

除了蝕讓外，亦有業主因要資金移民而以低價出售單位，好似珀麗灣一個海景兩房單位，早前以633萬元沽出，同類型單位半年前曾經賣過708萬，即是話最新成交價比高位低超過一成，據講業主是見「社會運動」惡化，決意減價賣樓，留備現金作移民海外。

多人移民，除了住宅單位有筍貨外，就連車位都不例外，近排有業主以150萬放售黃埔新村一個車位，代理街招話「移民急讓」，筆者當然即刻睇睇有幾筍，發現早兩個月同屋苑有車位叫價230萬同200萬都話賣出，不過就未有講明成交價，再睇睇田土廳紀錄，去年中屋苑車位成交價都要180萬，如果低過150萬，就要去到去年初，咁睇這個150萬的放盤又好似幾筍。雖然近期的社會運動好似緩和了一些，但唔知仍有多少人打算移民呢？又唔知仍有多少這類移民急讓的筍貨呢？