【樓市贏家】有公屋都怨？人生勝利組的貪嗔癡（徐峰）

香港住屋問題嚴重應該人人都知，想排問公屋十年八載點都走唔甩，如果筆者有需要又有資格的話，到排到公屋一刻相信會是一件相當興奮的事，但事實是，不少成功輪到公屋的人，還是奄尖聲悶，嫌東嫌西，公屋不就是為你提供一個基本的容身之所嗎？

由於筆者家中都有老人家正輪候公屋，所以早陣子都有加入一些公屋輪候人士交流消息的群組，但有時見到有些谷友的發言，會覺得，這到底是甚麼心態呢？

好似近排就有個谷友上網報喜，說自己排到長沙灣麗閣邨一個單位，點不知有人不知是葡萄還是真心講「比我不要，樓齡38年，好多嘢都老化，老人邨，比我就要麗翠苑」，幸好都有人公平地講「你拎綠置居同公屋比？」「有得比你選呀？ 麗閣邨的確地點係很方便，雖然係老人村，交通十分方便」。

另外又有人講，剛派到火炭新屋邨駿洋邨一個四人單位，但又覺得要2980元月租好貴，最攪笑是有人留言話「個人認為火炭地點普通，工廠區時常災難性塞車，車流已經overload，整條邨入伙後會更加嚴重，除非邨內市集設備完善，否則都幾吊腳，對比石門輸好遠。」

可能筆者身邊不少朋友都是租樓住，深明現時租金有幾「金」，3000蚊如果在私人市場，分分鐘連一個床位都租不到，如果可以租到一間屋可以住四個人，而且是全新樓，還有甚麼好嫌棄的地方呢？莫非你還要地鐵上蓋？要有海景？還是要名校網？

所以都有谷友留言話「$2980都話貴唔好要啦」，「咁平仲話貴，蘇屋村、安達村市區仲貴D」，「新邨又大又靚，火炭工業區山頂，火炭站步行2-3個字，有811/801小巴上去，附近大把工做亅。對這些留言，筆者相當欣賞，做人真係最緊要心足，知足才會常樂，如果這樣都不滿足，咁一班苦候多時但仍未派到屋的人，又如何是好呢！