雅虎香港財經 樓市贏家｜新盤銷情參差 分別只有一個（徐峰）
由四月中後，市場上新盤可謂一個接一個，由市區上車盤，到港島鐵路盤，又或者新界豪宅盤，各個地區，各個類型都應有盡有，就只怕你無錢買。之不過，有人賣過滿堂紅，又有人成績似乎一般般，到底何解？
要數近日市場最爆的新盤，可以說是黃竹坑站上蓋的晉環，早幾日賣樓，雖然間間過千萬，但仍然大把人爭購，240個單位半日掃清光，就連近排不少舖都要結業的百老匯，其家族都用了兩億幾入市，甚至有人用5萬幾蚊呎買個四房單位。
這個盤賣點，其實不用多說，就憑發展商一句，港島區30年來未有過鐵路上蓋盤推出。的確，港島區、鐵路上蓋，確是不少人，無論是投資者以及自住客揀樓的條件，而且，這個盤所在的黃竹坑站，距離金鐘站只有兩站之距，基本上對所有去銅鑼灣到上環，都是十幾分鐘的車程，這幾區有大量白領甚至專業人士上班，所以單是地點已「無得輸」。
而且，晉環是黃竹坑站上蓋、港島南岸6期發展項目的第一期，往後其他期數都是有大發展商例如長實、會德豐、新世界、信和、嘉里投得，加上以大地主港鐵的習性，同一個地點的不同期數，只會一期貴過一期，所以買到今期的買家，贏錢的機會都幾大。
講到地點，又怎能不提忽然熱鬧起來的旺角區呢！位於山東街的ONE SOHO，基本上行幾步就已是朗豪坊，行多幾步就到旺角港鐵站，所以早幾日賣樓都售出百幾間，以撞正晉環同日開盤來說，成績都還可以。
之不過，有人就趁ONE SOHO成績不俗，就趁機抽水，例如千望，不過呢，千望雖然都是位於旺角，但就是在煙廠街，既係近廣華醫院附近，很多糖水店及軍事店用品那邊，地點都還算方便，但比起ONE SOHO就差一截，而且，這個盤門外就已是街市，衛生情況實在需要考慮，再加上雖然千望入場費不用400萬，絕對是上車良機，但只有170幾呎，莫講話兩小口子，就算是單身貴族，如果多幾件衫、多幾對鞋，都未必放得下，所以收飛以來反應麻麻，就睇睇過幾天賣樓情況如何吧。
