【樓市贏家】買家喪搶 樓市不死（徐峰）

早兩個星期同大家講過，話雖然都是有新型冠狀病毒，不過今次武漢肺炎對樓價影響，並無當年沙士般嚴重，雖然這段期間都見到有部份業主願意蝕讓出貨，之不過，當你去睇樓時就會發覺，根本有大把客準備入市，只要平一點點，已有一班買家搶著要買，試問左這情況之下，樓價又怎會大跌呢？

其實筆者身邊不時都有朋友想買樓，近排就有位朋友，希望趁樓價回落入市，既然是想趁價錢平才入市，當然是尋找一些開價略低，再還價，希望可以執到筍貨。不過，這位朋友睇了幾個單位，還了幾次價後，開始發現，事情並不如他所想。

據這位朋友講，這幾次過程中，一是業主企硬不減，或者減完還是未跌前的市價，要不然就是考慮一個下午已被其他人捷足先得。筆者就跟他說，當你認為樓價會跌，所以去睇樓並計劃入市，其實，全香港有大量跟你有同一想法的人，就好似上個星期六日，做二手的代理忙到不得了，由早到晚都要外出睇樓，有睇報都會見到，有個別筍盤更有大批買家戴著口罩在走廊排隊等睇樓，就知香港人怕買不到樓多過怕病怕死，這種情況跟沙士完全不同，想樓價暴跌？似乎不太可能。

其實這種情況，又何止發生在二手樓。好似去年6月首推的一個元朗樓盤，自從6月推售首日賣出110多伙後，銷售進度一直未有太大突破，不過，在全市場幾乎所有新盤都拖慢賣樓之際，這個首批定價比同區二手樓貴兩三成的樓盤，忽然行高佣策略，基本佣金調高至6%，另有22至29萬元獎金，美其名是鼓勵代理更落力推銷樓盤，說到底又是靠回佣變相減價益買家，雖然只有幾個巴仙，不過已足以令樓價在疫情之下，短短4日已售出48個單位，就算是平日一樣賣出近20間，證明只要便宜一點點，只需要一點點，已有大群人衝出來買，如果你是業主或者發展商，見到這個場面，還願意大劈價嗎？除非是疫情直接影響到你失業令你無錢供樓，否則，長揸還需怕價錢會大冧？