雅虎香港財經 
VAR改變世界盃，也可以改變經濟（石先生）
世界盃開波至今，大家應該都覺得幾好睇吧！雖然今屆無意大利及荷蘭，但係喺門線技術及 VAR 嘅加持下，今年嘅世界盃真係不一樣。
以往嘅世界盃，邊有今屆咁多 12 碼。就算有 12 碼都一定好多討論，但依家係 VAR 呢種科技嘅幫助下，做後衞係禁區入面犯規，基本上無得走，一定會被坐係冷氣房嘅 VAR 裁判捉到再通知主球證睇重播，俾牌或者判 12 碼。
過去做前鋒，入到禁區可以做演員博博，扮被侵犯，但依家博12 碼實博唔到之餘，仲有機會被抽後算帳領黃牌。做龍門嘅，好似日本門將川島永嗣咁係個波過白界後撲番出來扮野，以前有用，但有門線技術幫手睇住，點扮都無用。
無論進攻抑或防守，今屆踢世界盃嘅球員於尺度上必須有所改變，唔係分分鐘唔係輸俾對手，係因為偷雞心態輸俾 VAR。當一項小科技進入足球，可以改變足球比賽嘅時候，我地嘅生活又點會唔受影響。
電視觀眾一早就已經係 VAR 裁判，只係以往 FIFA 心態保守唔願意用，直到今屆先將呢樣重播技術帶入球場，令足球比賽產生變化。一個科技上嘅小突破今日可能無人在意，但當佢成功被使用或者就改變社會。
科技公司也都一樣，好多時一件科技產品研發出來，唔係必然成功，仲好睇時機與際遇。好似 iPhone X 用緊嘅無線充電技術 Qi 咁，雖然係香港研發，但無相關嘅眼光、時間、心力及運氣。即使研發出來，都只係為他人作嫁衣裳。香港有無第二間舜宇光學，或者唔係睇研發能力，係睇市場能力吧。
作者：石先生（科技博客Stone IP）
===============
財經精選資訊網站「中環街市」 臉書粉絲頁
