雅虎香港財經 ViuTV全新節目《鬼同妳上位》劣評如潮 網民：腰斬吧啦
由火火、ERROR成員保錡及七仙羽師傅主持嘅ViuTV全新節目《鬼同妳上位》係一個靈探比賽真人騷，節目邀請咗8位靚女參加者勇闖猛鬼之地。比賽過程中，參加者需要接受膽量挑戰，從而爭取出鏡機會力爭上位，留到最後嗰位參加者就係冠軍。節目喺星期一已經開始播出，可惜惹嚟網民劣評如潮，直指主持人唔專重女性、節目太假及低級趣味等等，更希望ViuTV腰斬節目。
喺噚晚第4集，節目就繼續講到參加者到已故武打巨星大宅進行靈探，佢哋要求參加者交出所有護身物品，期間七仙羽師傅就向參加者講出佢哋嘅心事，之後湯沛宜（ToTo）可能有共鳴而突然爆喊，仲話：「都係想搵餐飯食，最緊要人冇事，但係而家除晒我啲嘢（護身符），仲慘過除晒我啲衫。」ToTo疑似鬼上身，突然瞓喺地下兼大喊大叫，七仙羽師傅隨即幫佢處理，保錡同火火就袖手旁觀。之後，ToTo繼續拍攝，更與柔柔一齊望住塊鏡進行削蘋果嘅任務。
睇完幾集之後，唔少網民都紛紛留言鬧爆節目，例如：「腰斬吧啦」、「我覺得兩位主持有啲唔尊重啲女仔囉」、「唔好睇囉。好假，全程都唔知做緊啲咩」、「三個主持真係不敢恭維，睇到我火都嚟！就算班女為出位，都唔代表不需要被尊重！強烈要求腰砍！」、「兩位男主持係唔係男人黎，姑勿論d女係咪交戲，見到女仔爆喊個反應都應該關心下而唔係喺度笑囉」、「火火同保錡！唔係人嚟㗎！唔止唔係男人！連人都唔係！見到個女仔癲哂咁衝入屋，7 師傅都叫哂幫手吖，竟然企喺度笑！係人唔係人吖！」、「viutv第一個最垃圾節目，咁嘅環境主持玩人，叫人着三點式？好X反感，師父所為請鬼叫人入屋，大部份人大哭大叫，我吾（唔）系（係）想睇呢D呀，主持和師父又唔入去感受一下，師父又話同鬼溝通，好X流姐（啫）！」、「就算要拍班女仔搏上位都要尊重人....成套嘢勁低級...cut咗佢啦唔該...」、「個ToTo好似被鬼上身癲左咁，兩位主持好似睇得好開心咁，完全唔識去關心人」、「我一直都好支持VIUTV，但今次真係唔掂，真係好垃圾，呢3個主持到底有冇尊重過D女仔同D眾生，玩埋D無聊野，你地去拍野已經騷擾，仲要做埋D百痴行為，完全唔識尊重，係要拍D三級綜藝就去沙灘呀，係度抽晒D靈異水」、「假到無朋友……-_-#」、「太胡鬧得個嘈字」及「假到爆。之前儲落嘅好口碑就咁斷送。」等等。
