【中環打工妹】 年年都話「大環境差」(袁莉詩)
學似莉詩咁打得工嘅,唔多唔少都會以「安居」為目標,只不過作為香港人又點會咁容易安居,一個家嘅價值比想像中還要高,要負擔得起真係談何容易。
望下環球經濟,Trump Trump 終於正式上場明言大打保護主義,拉工廠返美國保就業,其他國家驚唔驚都好,都要花多兩下心思喺 Trump Trump 新政之上;隔一個大西洋嘅歐洲同樣不明朗,有英國脫歐製造一個比歐豬五國更大嘅經濟不穩定性,本身健康嘅德國係新移民影響下已經唔算好景,依家作為歐盟老大,點樣將傷亡減到最低,真係複雜過微積分。
近近地嘅東亞都唔好得幾多,日本科技企業似乎應對唔到轉型問題,紛紛轉型求售,2020 奧運前雖然未必好差,但都唔會好得去邊;至於俾人咒佢「支爆」左幾年嘅鄰近國家似乎都仲頂得住,開始自救行動,但自救無錢不行,理得自己就無時間理人,強硬執行外匯管制應該都會維持一段時間。
咁嘅大環境下,分析員梗係同你講經濟環境不明朗,樓市有下跌可能,告誡「安居」一族要睇定啲。不過分析員無話你知咁嘅大環境下其他產品或者跌得仲甘,股市、債市樣樣都可能有價無市,但要住嘅點都要橦樓。
炒嘅人睇樓市有無得賺,唔會睇佢貴唔貴,但用嘅人唔睇賺定蝕,只會睇貴唔貴,所以樓價跌少少有人買,再跌一樣有人買。樓市關鍵從來唔係大環境,唔係貴唔貴,學誠哥話「只要你自住就唔會貴」。要住嘅無謂理啲閒言閒語,有啱嘅都係要買,因為你無辦法控制到大環境係升定跌,當然留意自己承受到幾多風險啦!
簡介:八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻