【企業錢途】 港鐵特惠站市場學（林苑莉）

近日網上不停討論一本新書關於乘搭地鐵，可以一個月節省多少錢，筆者不評論其目的，不過又令不少眼光再放到港鐵上。

相信各位少不免都會搭港鐵吧？頻密班次，快捷服務，呢啲係我哋追求緊嘅核心價值。港鐵既然已經成為生活一部份，受到的批評自然少不了，票價高昂向來是乘客經常批評的其中一項因素；港鐵一方，為回應訴求推出過一系列優惠措施，包括部份地點設置港鐵特惠站，但其實，佢嘅做法更似係市場推廣多於純粹優惠，點解呢？

首先，先了解下設立特惠站嘅條件同準則。港鐵規定，車站距離500米外嘅特定地點先會考慮設置特惠站，一般於特惠站拍卡再於指定鐵路站入閘上車，車程可獲得若干扣減（通常減兩蚊），簡單而言，就係要步行一段距離先會到地鐵站。假如你住喺地鐵站上蓋，你又會唔會用到呢項優惠呢? 你會唔會為兩蚊行多幾百米來回？相信咁趕時間嘅你，係唔會「享受」到呢項優惠。

反之，優惠根本就係要吸引距離較遠的一班非居民，前來搭地鐵。夾係兩個地鐵站中間嘅居民，一般出入會有更方便嘅巴士/小巴，而港鐵就係向呢班平時唔搭港鐵嘅客埋手，多於點贈既有客戶；呢班客，平兩蚊之下短途線或者可以平過搭巴士，假設，你在灣景中心拍卡，灣仔去北角就已經平過搭巴士返歸，明顯地港鐵可以話追住巴士「打」。

市場學上睇，呢個亦係吸引更多客源嘅方法。透過優惠去抵消客觀推銷因素，從而增加額外客源又增加市場份額之餘，又對本身營銷未有太大影響，呢類既市場營銷可以直接針對目標客群，成效立竿見影。

交通範疇的企業市場行銷，係比較特別，而至於其風險管理呢？我地下次再睇睇。

作者簡介：筆者林苑莉自命為烈女，原以為可不婚不生，不過5年後現為一個小師奶，嫁左一個荷蘭大叔，生了兩粒荷蘭豆，創建4間公司，上年於68個國家中贏出 全球青年創業家大獎，現為香港華人青年企業家協會會長，香港金融理財知識和能力策略的大使，每日在影響過千人，望成為一個能因材施教的教育家，希望人人 的生命有不同，有選擇。錢可算是一個重要學問，理財不一定只是搵錢。如何用，公司點用，學生點用？我希望出一點力，人人都可用自己的創意找生活空間。