【企業錢途】 談談市場定位（林苑莉）

做生意開舖其中一個要素就係市場定位，究竟你想賣啲乜畀人？你想邊啲人會買你嘅嘢？呢兩個問題就已經簡單帶出咩叫市場定位。現時網購盛行，今日就用網購做例子睇下市場定位嘅重要性吧。

冇一個商品係完全能夠服務到所有人，網購都一樣。最近有間大型網購XXXX喺商場開左咗實體舖，但奇怪嘅係店面好超市感覺，有陳列品，而且有不少sales教人點樣用佢個網購，呢個方法，似乎令到更多人認識該網，但就係付出成本太高，舖租、人工佔幾多運營成本？可想而知。

仲有，唔好唔記得商場樓上有超市，變相要再用更多優惠去吸引人購買你嘅產品，咁樣定位自己個利潤一定唔多，因為利用傳統租舖嘅方法，幾乎抵消哂網購優點。

既然做網購正常應該係target成日上網，可以平過市面，又唔太介意等嘅顧客，依家調返轉落街教人玩網購會唔會係本末倒置？成效又有幾高？而用呢個方法又會招到啲咩客返嚟呢？

我哋又可以睇睇另一例子，一個專做原箱優惠嘅網購，佢就係睇中啲唔洗拎返屋企，商品大眾化、來貨同出貨快、仲有最重要承諾到客人幾時送到，根本就係用最直接既方法簡單吸引啲客買，薄利多銷、呢個定位已經容易吸引到客人自己走嚟買，只係需要於入貨時再整個review已經容易分析啲貨源銷量等等，如此清晰定位自然效率高，自然高下立見。

所以做生意真係有啲金科玉律係萬變不離其中，首先要熟悉行業背景、動態；了解客戶特性、偏好等呢啲都係基本功，再配合清晰的定位，有合適市場包裝，用心經營，自然會踏上成功軌道。缺乏清晰定位，就會好易混亂，如果未有一個有效疏理方法嘅話，就算有更多錢都只會掉落海而已。