【大茶飯】四個原因撐港股(青冰)
大家呢排對住大利市機,如果稍為唔夠精神,相信唔使一分鐘就會見到周公。唔少人減少操作,部份更係熄機離場,無怪乎成交奀過我個荷包。作為股市大好友,青冰梗係要在悶市發放正能量,今日畀四個原因,點解要撐港股。
1.物極必反。眾所周知,十個人炒股票九個半輸錢,家陣個個睇到好淡,驚A股入摩失敗、驚英國脫歐、驚美國加息,個個都驚青,反而就係挾倉嘅良機,萬試萬靈。
2.深港互通。「滬港通都冇晒力啦,深港通肯定冇用啦!」還記得2012年美國醞釀推QE3時,個個都話冇用,結果恒指短短幾個月升咗兩成,唔少人眼光光得個睇字。
3.唔熟唔炒。你食開中國菜,偶爾鋸扒、食意粉、薄餅還可以,但要你餐餐冇飯到肚,感覺一定難受。炒股嘛,你玩開港股,要你轉型玩美股同A股,唔係唔得,但所花人力物力,肯定大過回報,既然係咁,不如將雙倍心機花在本地市場,事半功倍。
4.惡性循環。眾所周知,股市與經濟息息相關,股市唔掂,財富效應威力大減,經濟肯定大鑊。一句到尾,你唔撐港股,你都有份捱,大市成交一蚊都不能少,你作為港股中流砥柱,知道點做啦?
註︰本文寫在上周五早上,下午個市起勢衝,你話呢個世界幾咁美好!神州控股(861)上演股權爭奪戰,北水(6999經紀牌)狂掃,睇嚟仲有大把水位,小注參與無妨。