【大茶飯】攻守兼備高息股(青冰)
師傅教落,炒股要眾地莫企,即係全世界都買同一樣嘢,你就要避開,因為泡沫隨時爆破。近期最經典例子,莫過於瑞聲科技(2018)及舜宇光學(2382),兩隻科技股超新星,今年升到冇人信,前者仲升呢做埋藍籌,好不威風。不過,近月兩者似乎無以為繼,齊齊由高位回調超過一成,無他,連牛頭角順嫂都走去買,聰明錢由低位買起,利潤講緊倍倍聲,唔沽畀你沽畀邊個,股價見頂變得理所當然。
同一道理,青冰愛股滙控(005)由北水帶起,由五字頭衝上六字頭,已引起不少散戶關注,所以股價開始見阻力,要進一步破位似乎需要時間,不過回購活動未有靜止,低位支持力極強,用期權Short Put贏面甚大。
今日冇新冧巴,叫大家繼續關注東江集團(2283),8月底推介至累升約一成,中規中矩。最新消息金手指惠理(806)旗下高息基金,增持股份至8.03%,最新增持價2.15元,於一年高位照樣掃貨,一來證明惠理充滿信心,二來反映呢隻蘋果概念股大把水位;現價仍有五厘息墊底,攻守兼備,唔買仲等幾時?