【大茶飯】精電大圓底隨時爆升（青冰）

過去大半年，最強的概念都係車同手機，吉利(0175)固然係勁，不過舜宇(2382)在過去12個月累升兩倍，隨時係下一隻藍籌添，而佢嘅兩大業務，就係車載鏡頭同手機鏡頭，順藤摸瓜，所以早前多番推介丘鈦(1478)及億和(0838)，都係睇好這兩大行業，今次講嘅精電(0710)，或者會係今年嘅爆升股。

精電主要生產車用顯示屏，由於單色顯示屏逐漸被取代，現時公司主力係液晶顯示屏(TFT)。而全球TFT主要生產商京東方，去年入主精電，無論在技術及資金上，都可以強勁地支持精電，發展成為領先的車用TFT供應商。上星期有傳聞話蘋果的新iphone，將會揀京東方為OLED顯示屏的供應商，可見佢地的技術層面已達國際級。而京東方都講過，除咗本身的強項手機顯示屏，亦睇好車用屏幕呢個板塊，所以收購精電，並唔係想買隻殼玩下，而係想大力發展。

美國已規定在2018前，所有一萬磅以下的新車必須安裝後泊鏡頭，可見車載鏡頭已成必須品，咁有鏡頭就自然要有顯示屏啦，需求看漲是毫無疑問的，你睇依家Tesla或新款的靚車，個display幾靚仔，同手機互動亦愈來愈多，未來的智能汽車，都會朝住呢個方向發展，咁京東方有手機有車又有大客，想唔肥都幾難，有個肥媽，精電一定做肥仔吧。

精電在去年中派特別息後，股價反覆尋底，不過現在開幅圖出黎睇，就發現是一個圓底收集，上月盈警之後仲慢慢爬升，似乎好戲即將上演，有買趁手。