【大茶飯】路訊通有燦哥 值得憧憬（青冰）

九巴(0062)專營權喺今年七月屆滿，政府亦向立法會提交文件，話大致完成專營權嘅相討工作，當中包括一啲乘車優惠，及同電車合作搞轉乘優惠。九巴亦都承諾會改善車廂及候車站設施，喺有蓋巴士站設顯示屏，喺車廂下層提供上層空座實時資訊，更加會將二千部巴士裝Wi-Fi。

就咁聽落，九巴似乎承諾咗唔少野，亦都要使唔少錢，不過正如青冰在其他專欄提及過，九巴最值錢的不是巴士服務，而係揸住觀塘創紀之城附近巧明街的發展項目，補地價都要43億銀，之後會同母公司新地(0016)合作，發展商業用途，呢單野完全未反映過在股價之上，日後可多加留意。

講番巴士服務，九巴拍心口要發展的，都係科技野，唔算係太高科技，但都叫做係資訊吖，所以順理成章會由阿仔路訊通(0888)幫手。路訊通市值7億，手持三億幾現金，本身已經係一隻好殼，但由於出身名門望族，身為新地系，何需要走去賣殼呢，所以咁多年都冇炒過，無計架，業務真係唔見太大發展，又唔賣，股價只能長期在低位浮沉。

股價上個月底忽然起動，就係因為委任咗資深傳媒人羅燦做董事總經理，燦哥二月先上任，又未見傳媒又冇公開講過嘢，股價已經累積升咗5成，似乎大家都好期待燦哥可以搞活番路訊通，前文提及過，巴士站的顯示屏，車廂內的資訊，呢啲每日都可以接觸到幾十萬人次，有人睇嘅資訊就有價值了，只要搞好個內容，廣告自然會接踵而來，而搞內容，正係燦哥的專長，咁又真係幾值得憧憬喎，雖然升咗5成，但仍然偏低囉，趁有回吐要上車喇。