【姿色中環】北水抽爆機的炒股方程式(Samantha)
每個升市,表面睇,咪又係指數升囉!如果對這個答案已感到滿足的話,最佳選擇可能是買惠理集團(806),但求不會落後於大市,既方便又快捷。
作為一個有要求的股民,都希望憑著自己的眼光令倉位快速成長,最好拋甩大市幾條街,故有必要更進一步搞清楚遊戲的玩法,今次與2015年大時代主角一樣是北水,但北水顯然掃貨有條理得多,雞犬皆升場面不再,只集中攻個別中資龍頭股,一貫中國式炒法,專攻一隻股抽到爆機為止,好似大陸商品期貨咁,爆炒到阿爺喝停為止,妙就妙在爆炒港股係唔會被喝停的。
大市在美匯轉強和滙控績差陰影下,中資不待大市回調,在高位大舉落場掃貨,這結果真係此料不及,等於閣下跑咗10公里,抖唔夠10分鐘,已經俾人拉住走。問題是,北水以這般強硬的姿態入市,會否反迫外資追番啲貨呢?Samantha即管掃定啲中資股和買定花生睇好戲。
鑑於今次中資股實屬個別炒作,龍頭和龍尾命運殊途,揀股上最好揀大路股會比較好,今日繼續推介水泥股,無他,因為此板塊獲得中外資大行一致看好,承著供給側改革,水泥庫存降至2013年以來最低的水平,農曆新年後基建建築需求回復正常,再加上空氣污染問題對水泥廠作出限產,都進一步推升水泥的價格,今日推介中建材(3323)。
中建材過去一向負債比率偏高,當水泥價格下跌時這些高負債的公司股價一沉百踩,但當水泥價格止跌回升時高槓桿亦都令股價加快攀升。再者,中建材是國企改革試點,與中材集團重組,上月也出售資產予洛玻(1108)。
中建材下月公佈的全年業績非常關鍵,若證實國企改革和水泥價格能利好業績,這是一個估值修復的機會。再者在香港上市中國建材,屬央企中國建材集團的核心企業,鑑於沒有A股上市,具有其獨特性,該股爆升近9%後昨日出現回調,可在5.5元附近買入,目標價先睇7.2元,跌穿5元止蝕。