雅虎香港財經 【異動尋寶】一隻低調靚殼 開始蠢蠢欲動…（魏力）
市況轉弱，但近日市傳證監、港交所（388）年內將收緊借殼、賣殼要求，故靚殼仍是有買趁手、有價有市；另一邊廂，本港經濟下滑，零售、廣告市道甚差，連傾賣盤多番觸礁的米蘭站（1150）都有眉目，反映殼主心頭無以前咁高，相對易傾咗。
早幾日筆者搭巴士，由於電話無電，唯有不做低頭族，眼光光望住前面部電視，不其然諗起一隻頗有賣殼潛力的股票：路訊通（888）。
路訊通集齊三大靚殼特徵於一身：業務前景欠佳、股權集中、財務狀況健康。Common Sense去睇，家陣乘客上車，10個有9個都係望電話，睇RoadShow有幾多人？宣傳效力大減，廣告客戶又豈會不知？受眾行為的改變，加上過去一年經濟不景，廣告費自然受壓，拖累去年業績見紅，虧損4,790萬元。值得留意，集團去年出現一筆1,310萬元的應收賬減值虧損，即係爛數預咗收唔番要撇賬，經營前景不容樂觀。
股權方面，現時由新地（016）通過載通（062）持有74.3%，查番CCASS，目前該手貨應不在CCASS之內，意味市場中街貨只有約2成，相當乾身。日後如該批7成股份入番去CCASS，就是賣殼的一大訊號。
財務狀況方面，路訊通手持現金3.7億港元，連同已抵押銀行存款約8,000萬元，現金量高達4.5億元，扣除1.2億元負債，淨現金達3.3億元，已佔市值（6.3億元）52%，何況目前殼價至少都5億元，可見現時路訊通股價具相當大的吸引力。
上述三大因素外，路訊通本身的上市編號888更是一大賣點，尤其對大陸買家而言，為獲「發發發」上市編號，多付些殼價又有咩所謂？再講，路訊通本身經營媒體廣告業務，屬內地的朝陽行業，獲內地同業借殼絕不意外，為呢隻殼再添賣點。
走勢上，路訊通近日低位蠢蠢欲動，似乎有聰明錢開始吸納，MACD重現雙牛，9 RSI趨升，值得現水平先落一注，話唔定有意外驚喜！目標先睇8億市值（8毫），失守0.53元止蝕。
